കണ്ണൂർ അരിയിലെ എംഎസ്എഫ് പ്രവർത്തകൻ അബ്ദുൽ ഷുക്കൂറിനെ കൊലപ്പെടുത്തിയ കേസിൽ പ്രതികൾക്കുള്ള ശിക്ഷ നവംബർ 12ന് പ്രഖ്യാപിക്കും. കൊച്ചിയിലെ സിബിഐ പ്രത്യേക കോടതിയാണ് സിപിഎം നേതാക്കളായ പി ജയരാജനും ടി വി രാജേഷും ഉൾപ്പെടെ 31 പ്രതികളുടെ ശിക്ഷ വിധിക്കുക.
കണ്ണൂർ ജില്ലാ സെക്രട്ടറിയായിരുന്ന പി ജയരാജന്റെ വാഹനവ്യൂഹം തടഞ്ഞുനിർത്തി ആക്രമിച്ചുവെന്ന് ആരോപിച്ച് ഷുക്കൂറിനെ പരസ്യവിചാരണ ചെയ്ത് കൊലപ്പെടുത്തി എന്നതാണ് കേസ്. 2012 ഫെബ്രുവരി 12ന് തളിപ്പറമ്പിലെ ചുള്ളിയോട് വയലിൽ വച്ചായിരുന്നു കൊലപാതകം.
ജയരാജനും അന്ന് എംഎൽഎയായിരുന്ന ടി വി രാജേഷും ഉൾപ്പെടെയുള്ളവരുടെ കാർ മുസ്ലിം ലീഗ് പ്രവർത്തകർ തടഞ്ഞുനിർത്തി ആക്രമിച്ചതിനുള്ള പ്രതികാരമായിരുന്നു ഈ ക്രൂരതയെന്നാണ് ആരോപണം. ഷുക്കൂർ അടക്കമുള്ള ലീഗ് പ്രവർത്തകരെ പിന്നീട് സിപിഎമ്മുകാർ പിടിച്ചുനിർത്തുകയും അവരുടെ ചിത്രം എസ്എംഎസ് വഴി അയച്ചുനൽകുകയും ചെയ്തു. ഇവർ തന്നെയാണ് ആക്രമിച്ചവരെന്ന് ഉറപ്പിച്ച ശേഷം ഷുക്കൂറിനെയും സക്കറിയ, അയൂബ് എന്നിവരെയും ആക്രമിച്ചു. ഷുക്കൂർ സംഭവസ്ഥലത്തുവച്ചുതന്നെ മരിച്ചു.
തളിപ്പറമ്പിലെ ഡിവൈഎഫ്ഐ പ്രവർത്തകരായ കെ വി സുമേഷും ഗണേഷൻ പിയുമാണ് കേസിലെ ഒന്നും രണ്ടും പ്രതികൾ. സി എൻ മോഹനൻ പതിനൊന്നാം പ്രതിയാണ്. സിപിഎം സംസ്ഥാന സെക്രട്ടറി എം വി ഗോവിന്ദന്റെ മകൻ ശ്യാംജിത്തും പ്രതികളിൽ ഉൾപ്പെടുന്നു.
കേസിൽ 32ാം പ്രതിയാണ് പി ജയരാജൻ, 33ാം പ്രതി ടി വി രാജേഷ്. ഇരുവർക്കുമെതിരെ ചുമത്തിയിരിക്കുന്നത് ഗൂഢാലോചനക്കുറ്റമാണ്. ജയരാജനെ തളിപ്പറമ്പ് സഹകരണ ആശുപത്രിയിൽ പ്രവേശിപ്പിച്ചപ്പോൾ അവിടെ വച്ചാണ് ഗൂഢാലോചന നടന്നതെന്നാണ് സിബിഐയുടെ കണ്ടെത്തൽ. എന്നാൽ ഗൂഢാലോചനയിൽ ഇവരുടെ പങ്ക് തെളിയിക്കാൻ ആശ്രയിക്കേണ്ടിയിരുന്ന രണ്ട് പ്രധാന സാക്ഷികളും വിചാരണ കോടതിയിൽ ഹാജരായി മൊഴി നൽകിയിരുന്നില്ല.