ഡിവൈഎഫ്‌ഐ ആലപ്പുഴ ജില്ലാ സെക്രട്ടറി ജെയിംസ് സാമുവലിനെതിരെ മൂന്നാമതൊരു കേസ് കൂടി രജിസ്റ്റര്‍ ചെയ്തു. മന്ത്രി എം ലിജു നല്‍കിയ പരാതിയിലാണ് ആലപ്പുഴ സൗത്ത് പോലീസ് നടപടിയെടുത്തത്. നെടുമ്പാശ്ശേരി വാഹനാപകട കേസിലെ പ്രതിയെ സഹായിച്ചു എന്ന ആരോപണമാണ് പരാതിക്ക് ആധാരം.
ഇതിനു മുൻപ് ഡെപ്യൂട്ടി സ്പീക്കർ ഷാനിമോള്‍ ഉസ്മാന്റെയും കോണ്‍ഗ്രസ് നേതാവ് എ എ ഷുക്കൂറിന്റെയും പരാതികളിലും ജെയിംസ് സാമുവലിനെതിരെ കേസെടുത്തിരുന്നു. അപകടക്കേസിലെ പ്രതിയെ രക്ഷപ്പെടുത്താന്‍ ഷാനിമോള്‍ ഉസ്മാന്‍ ഇടപെട്ടെന്ന് ജില്ലാ സെക്രട്ടറി ആരോപിച്ചിരുന്നു. കലാപാഹ്വാനം നടത്തി എന്ന കുറ്റമാണ് ഷാനിമോളുടെ പരാതിയില്‍ ചുമത്തിയിരിക്കുന്നത്. ജില്ലാ സെക്രട്ടറിയുടെ പ്രതികരണം രേഖപ്പെടുത്തിയ മാധ്യമപ്രവര്‍ത്തകനെയും ഈ കേസില്‍ പ്രതി ചേര്‍ത്തിട്ടുണ്ട്.പ്രതിയെ സഹായിക്കാന്‍ എ എ ഷുക്കൂര്‍ ഇടപെട്ടു എന്നും ജെയിംസ് സാമുവല്‍ ആരോപണം ഉന്നയിച്ചിരുന്നു. ഇതിനെതിരെ ഷുക്കൂറും പരാതി നല്‍കി. ജില്ലാ സെക്രട്ടറിയുടെ പ്രതികരണം സംപ്രേഷണം ചെയ്ത റിപ്പോര്‍ട്ടര്‍ ടിവിയില്‍ നിന്ന് തെളിവുകള്‍ ശേഖരിക്കണമെന്നും പരാതിയില്‍ ആവശ്യപ്പെടുന്നു. സംഭവത്തിനു പിന്നില്‍ ഗൂഢാലോചനയുണ്ടെന്നാണ് ഷുക്കൂറിന്റെ നിലപാട്.
ഇതിനിടെ, വ്യാജപ്രചാരണം നടത്തിയതിന് കേസെടുക്കണമെന്ന ആവശ്യവുമായി ഡിവൈഎഫ്‌ഐ ആലപ്പുഴ ജില്ലാ സെക്രട്ടറി ജെയിംസ് സാമുവല്‍ ഡിജിപിയ്ക്ക് പരാതി നല്‍കിയിട്ടുണ്ട്.