സ്കൂള്‍ ബാഗുകളുടെ അമിതഭാരം കുറയ്ക്കുന്നതിനായി നിർണ്ണായക നീക്കങ്ങളുമായി സംസ്ഥാന സർക്കാർ രംഗത്തെത്തി. ഇക്കാര്യത്തില്‍ വരുംദിവസങ്ങളില്‍ വിശദമായ ചർച്ചകള്‍ നടത്തുമെന്ന് വിദ്യാഭ്യാസ മന്ത്രി എൻ. ഷംസുദീൻ നിയമസഭയെ അറിയിച്ചു.വിഷയം ചർച്ച ചെയ്യാനായി അടുത്ത മാസം 24-ന് പ്രത്യേക യോഗം വിളിച്ചിട്ടുണ്ടെന്നും മന്ത്രി സഭയില്‍ വ്യക്തമാക്കി.
ഭാരം കുറഞ്ഞ കടലാസില്‍ പാഠപുസ്തകങ്ങള്‍ അച്ചടിക്കുന്ന കാര്യം സർക്കാരിന്റെ പരിഗണനയിലുണ്ട്. പുസ്തകങ്ങളുടെ വലിപ്പം കുറയ്ക്കാനായി അവയെ അർദ്ധവാർഷികാടിസ്ഥാനത്തില്‍ ഭാഗങ്ങളായി വിഭജിക്കാനും ആലോചനയുണ്ടെന്ന് അദ്ദേഹം പറഞ്ഞു.കൈപ്പമംഗലം എംഎല്‍എ കെ.കെ. വത്സരാജിന് തന്റെ മണ്ഡലത്തിലെ ഒരു സ്കൂള്‍ ലീഡർ നല്‍കിയ നിവേദനമാണ് റൂള്‍ 113 പ്രകാരം ശ്രദ്ധക്ഷണിക്കലായി സഭയിലെത്തിയത്. ഹൈസ്കൂള്‍ കുട്ടികളുടെ ബാഗുകളുടെ അമിതഭാരം കുറയ്ക്കണമെന്നതായിരുന്നു വിദ്യാർത്ഥിനിയുടെ പ്രധാന ആവശ്യം.
എംഎല്‍എ ഈ നിവേദനം സ്പീക്കറുടെ ഓഫീസിന്റെ ശ്രദ്ധയില്‍പ്പെടുത്തി. തുടർന്ന് പെറ്റീഷനായി അവതരിപ്പിക്കാൻ അനുമതി ലഭിക്കുകയായിരുന്നു.നിയമസഭാ ചട്ടം 113 പ്രകാരം ജനകീയ വിഷയങ്ങളിലുള്ള പെറ്റീഷനുകള്‍ സഭയില്‍ അവതരിപ്പിക്കാൻ അംഗങ്ങള്‍ക്ക് അവകാശമുണ്ട്. ഇതിന്മേല്‍ സഭയില്‍ നേരിട്ട് ചർച്ച നടക്കാറില്ലെങ്കിലും, വിഷയം പെറ്റീഷൻ കമ്മിറ്റിയുടെ പരിഗണനയ്ക്ക് വിടുന്നതാണ് കീഴ്‌വഴക്കം.