എറണാകുളം സെൻട്രൽ പൊലീസ് സ്റ്റേഷനിലെ ലോക്കറിൽ സൂക്ഷിച്ചിരുന്ന രാസലഹരി കവർന്ന കേസിൽ എസ്.ഐ അറസ്റ്റിലായി. തിരുവനന്തപുരം കാട്ടാക്കട സ്വദേശി അനസ് എസ്. തൗഫീഖ് ആണ് പിടിയിലായത്. സംഭവത്തെത്തുടർന്ന് ഇദ്ദേഹത്തെ സർവീസിൽ നിന്ന് സസ്പെൻഡ് ചെയ്യുകയും വകുപ്പുതല അന്വേഷണത്തിന് ഉത്തരവിടുകയും ചെയ്തിട്ടുണ്ട്.
കോടതി നടപടികൾ പൂർത്തിയാക്കി നശിപ്പിക്കുന്നതിനായി ലോക്കർ റൂമിൽ വെച്ചിരുന്ന 87 ഗ്രാം രാസലഹരിയാണ് സീൽ ചെയ്ത കവറോടെ അനസ് പുറത്തേക്ക് കൊണ്ടുപോയത്. അന്വേഷണം തന്നിലേക്ക് എത്തുമെന്ന് ബോധ്യമായപ്പോൾ 202 ഗ്രാം രാസലഹരി ഇദ്ദേഹം തിരികെ ഏൽപ്പിച്ചു. കവർന്നതിന്റെ ഏകദേശം രണ്ടര ഇരട്ടി ലഹരിമരുന്ന് സീൽ ചെയ്യാത്ത കവറിലാണ് എസ്.ഐ തിരിച്ചെത്തിച്ചത്.
ലഹരി പുറത്തുകടത്തിയത് എന്തിനാണെന്നും, തിരികെ ഏൽപ്പിച്ചപ്പോൾ അധിക അളവ് എങ്ങനെ വന്നുവെന്നും ഇതുവരെ പൊലീസിന് വ്യക്തമായിട്ടില്ല. ചോദ്യം ചെയ്യലിലും സ്റ്റേഷൻ ഹൗസ് ഓഫീസർക്ക് നൽകിയ വിശദീകരണത്തിലും ഇദ്ദേഹം വ്യാജ വാദങ്ങളാണ് ഉന്നയിച്ചതെന്ന് സസ്പെൻഷൻ ഉത്തരവിൽ പറയുന്നു.
ലഹരി വിരുദ്ധ പദ്ധതിയായ ‘ഓപ്പറേഷൻ തൂഫാൻ’ന്റെ ഭാഗമായി ബോധവൽക്കരണ ക്ലാസുകൾ നൽകുന്നതിൽ സജീവമായിരുന്ന ഉദ്യോഗസ്ഥനാണ് ഇപ്പോൾ ലഹരിക്കേസിൽ പ്രതിയായിരിക്കുന്നത്. മുൻ ലഹരിക്കേസുകളിൽ വിവരങ്ങൾ ചോർത്തി നൽകിയിട്ടുണ്ടോ, അല്ലെങ്കിൽ മറ്റാരെയെങ്കിലും കേസിൽ കുടുക്കാനാണോ ലഹരി കടത്തിയത് തുടങ്ങിയ കാര്യങ്ങൾ പൊലീസ് വിശദമായി അന്വേഷിച്ചുവരികയാണ്. ട്രാഫിക് വെസ്റ്റ് എ.സി.പി അന്വേഷണം നടത്തി പത്ത് ദിവസത്തിനകം റിപ്പോർട്ട് സമർപ്പിക്കും.
സ്റ്റേഷൻ ലോക്കറിൽ നിന്ന് 87 ഗ്രാം ലഹരിമരുന്നിന്റെ കവർ കാണാതായതിനെത്തുടർന്ന് നടത്തിയ പരിശോധനയിലാണ് ഈ മാസം 18-ന് അനസ് ലോക്കർ മുറിയിൽ പ്രവേശിച്ചതായി കണ്ടെത്തിയത്. അന്വേഷണത്തിന്റെ ഭാഗമായി സ്റ്റേഷൻ അധികൃതർ ലോക്കർ മുറിയുടെ താക്കോൽ മാറ്റിയിരുന്നു. ഈ താക്കോൽ തേടി അനസ് എത്തിയതോടെയാണ് പൊലീസിന് സംശയം ബലപ്പെടുകയും വിശദീകരണം ആവശ്യപ്പെടുകയും ചെയ്തത്. കാര്യങ്ങൾ കൈവിട്ടുപോകുമെന്ന് ഉറപ്പായതോടെയാണ് ഇദ്ദേഹം കവർ തിരികെ ഏൽപ്പിച്ചത്.