പാങ്ങപ്പാറയിൽ 17 വയസ്സുകാരനായ അഭിറാമിനെ തട്ടിക്കൊണ്ടുപോയി കൊലപ്പെടുത്തിയ കേസിലെ ഒന്നാം പ്രതിയായ 17കാരന്റെ ജാമ്യാപേക്ഷ ജുവനൈൽ ജസ്റ്റിസ് ബോർഡ് തള്ളി. പ്രതിയുടെ മാനസികാവസ്ഥ കണക്കിലെടുത്താണ് ഈ തീരുമാനം.
കൗൺസിലിംഗ് നടത്തിയ ഡോക്ടർമാർ, പ്രതിയുടെ മാനസികാവസ്ഥ ഒരു പ്രായപൂർത്തിയായ കുറ്റവാളിയുടേതിന് സമാനമാണെന്ന് റിപ്പോർട്ട് നൽകി. ഈ റിപ്പോർട്ടാണ് ബോർഡിന്റെ ഉത്തരവിന് അടിസ്ഥാനമായത്. വിചാരണ നേരിടുന്നതിന് പ്രതിക്ക് മാനസികമായ യാതൊരു തടസ്സവുമില്ലെന്ന് മെഡിക്കൽ ബോർഡും അറിയിച്ചു.
നേരത്തെ, പ്രതിയുടെ മാനസികനില വിശദമായി പരിശോധിക്കാൻ കോടതി പേരൂർക്കട മാനസികാരോഗ്യ കേന്ദ്രത്തിലേക്ക് അയച്ചിരുന്നു. അവിടെ നടന്ന പരിശോധനകൾക്കും കൗൺസിലിംഗിനും ശേഷമാണ് ഡോക്ടർമാരുടെ സംഘം ബോർഡിന് റിപ്പോർട്ട് സമർപ്പിച്ചത്.
പ്രായപൂർത്തിയാകാത്തയാളെന്ന ആനുകൂല്യത്തിൽ ജാമ്യം നൽകിയാൽ കേസിനെ ബാധിക്കുമെന്ന പ്രോസിക്യൂഷൻ വാദവും, മെഡിക്കൽ റിപ്പോർട്ടിലെ കണ്ടെത്തലുകളും ശരിവെച്ചാണ് ബോർഡ് ജാമ്യം നിഷേധിച്ചത്. കേസിലെ തുടർനടപടികൾ ഇപ്പോൾ നിർണ്ണായക ഘട്ടത്തിലേക്ക് കടക്കുകയാണ്.
അഭിറാമിന്റെ തലയോട്ടിക്ക് ഏറ്റ പരിക്ക് തേങ്ങകൊണ്ടുള്ള ഇടിയിൽ നിന്നുള്ളതാണെന്ന് കണ്ടെത്തി. പോസ്റ്റ്മോർട്ടത്തിൽ തലയോട്ടിക്ക് ക്ഷതമേറ്റതായി തെളിഞ്ഞിരുന്നെങ്കിലും, ഇപ്പോഴാണ് അതിന്റെ കാരണത്തിൽ വ്യക്തത വന്നത്.
പ്രതിയായ 17കാരനുമായി നടത്തിയ കൗൺസിലിംഗിലൂടെയാണ് കൊലപാതകത്തെക്കുറിച്ചുള്ള വിവരങ്ങൾ പുറത്തുവന്നത്. കൊല നടന്ന സ്ഥലത്ത് എത്തിയശേഷമുണ്ടായ തർക്കത്തിനിടെ പ്രതി തേങ്ങകൊണ്ട് അഭിറാമിന്റെ തലയ്ക്ക് ശക്തമായി ഇടിച്ചു. ബോധം നശിച്ച അഭിറാമിനെ അവിടെ ഉപേക്ഷിച്ച ശേഷം പ്രതി പുറത്തുപോയി കൂട്ടാളി ഒമറിനെയും കൂട്ടി തിരിച്ചെത്തി. അർദ്ധബോധാവസ്ഥയിൽ കിടന്ന അഭിറാമിനെ ഉണർത്തിയശേഷം ഇരുവരും ചേർന്ന് ബെൽറ്റ് മുറുക്കി കൊലപ്പെടുത്തി.
പ്രദേശത്ത് നടത്തിയ തെളിവെടുപ്പിൽ അഭിറാമിനെ ഇടിക്കാൻ ഉപയോഗിച്ച തേങ്ങ കണ്ടെടുത്തു. കസ്റ്റഡിയിലുള്ള 17കാരനെ സ്ഥലത്ത് എത്തിച്ചാണ് തെളിവെടുപ്പ് നടത്തിയത്.പ്രണയത്തർക്കവുമായി ബന്ധപ്പെട്ട വൈരാഗ്യമാണ് കൊലയ്ക്ക് വഴിവെച്ചതെന്ന് പോലീസ് പറയുന്നു. ഒന്നാം പ്രതിയുടെ മുൻ കാമുകിയുമായി അഭിറാമിന്റെ സുഹൃത്ത് അടുപ്പത്തിലായതിനെത്തുടർന്ന്, ആ സുഹൃത്തിനെ ആക്രമിക്കാനായിരുന്നു പ്രതികളുടെ ആദ്യ പദ്ധതി. ഇതിനായി പെൺസുഹൃത്തിന്റെ ഇൻസ്റ്റാഗ്രാം അക്കൗണ്ട് ഉപയോഗിച്ച് സന്ദേശമയച്ച് അഭിറാമിനെ പാങ്ങപ്പാറയിലേക്ക് വിളിച്ചുവരുത്തി. സ്ഥലത്തെത്തിയ അഭിറാമിനോട് സുഹൃത്തിനെ വിളിച്ചുവരുത്താൻ പ്രതി ആവശ്യപ്പെട്ടു.
സുഹൃത്ത് എത്താതിരുന്നതോടെ ഇരുവരും തമ്മിൽ വാക്കേറ്റമുണ്ടായി. തുടർന്ന് തേങ്ങകൊണ്ട് തലയ്ക്ക് അടിച്ച് വീഴ്ത്തിയ ശേഷം ബെൽറ്റ് ഉപയോഗിച്ച് കഴുത്തുഞെരിച്ച് കൊലപ്പെടുത്തുകയായിരുന്നു.







