വിദ്യാഭ്യാസ മന്ത്രി എൻ ഷംസുദ്ദീൻ മലപ്പുറത്ത് വെച്ച് പറഞ്ഞത്, പിഎം ശ്രീ പദ്ധതിയെക്കുറിച്ച് പലതരം അഭിപ്രായങ്ങളുണ്ടെന്നും അവയെല്ലാം പരിശോധിച്ചുവരികയാണെന്നുമാണ്. ഇതുവരെ ഈ വിഷയത്തിൽ സർക്കാർ അന്തിമ തീരുമാനമൊന്നും എടുത്തിട്ടില്ല.
കേന്ദ്ര സർക്കാരിന്റെ ഫണ്ട് എല്ലാവർക്കും അവകാശപ്പെട്ടതാണെന്നും ആ ഫണ്ട് ലഭിക്കാൻ കേരളത്തിന് അർഹതയും യോഗ്യതയുമുണ്ടെന്നും മന്ത്രി വ്യക്തമാക്കി. കേരളത്തിലെ കുട്ടികളുടെ അവകാശമാണ് ഈ കേന്ദ്ര ഫണ്ട്. നമ്മൾ നൽകുന്ന നികുതിയുടെ ഒരു വിഹിതമാണ് കേന്ദ്രത്തിലേക്ക് പോകുന്നത്, അതുകൊണ്ടുതന്നെ അത് തിരിച്ചുകിട്ടേണ്ടതാണെന്നും മന്ത്രി പറഞ്ഞു.
പിഎം ശ്രീ ഉപാധികളോടെ നടപ്പാക്കാമെന്ന ഭരണ പരിഷ്‌കാര കമ്മീഷൻ അധ്യക്ഷൻ എം കെ മുനീറിന്റെ പരാമർശത്തോടുള്ള പ്രതികരണമായാണ് മന്ത്രി ഇക്കാര്യങ്ങൾ പറഞ്ഞത്. എന്നാൽ മുനീറിന്റെ പരാമർശം തന്റെ ശ്രദ്ധയിൽ പെട്ടിരുന്നില്ലെന്നും മന്ത്രി അറിയിച്ചു.
സമഗ്രശിക്ഷ വഴിയാണ് ഏറ്റവും കൂടുതൽ ഫണ്ട് കേരളത്തിന് ലഭിക്കുന്നത്. വിവിധ ഇനങ്ങളിലായി ഏകദേശം 2000 കോടി രൂപ കേരളത്തിന് കിട്ടാനുണ്ടെന്നും മന്ത്രി പറഞ്ഞു. രാഷ്ട്രീയ പശ്ചാത്തലമുള്ള വിഷയമായതിനാൽ ഇതിൽ കുറച്ചധികം ചർച്ചകൾ വേണ്ടിവരുമെന്നും അത് വിദ്യാഭ്യാസ വകുപ്പിന് ചില ബുദ്ധിമുട്ടുകൾ സൃഷ്ടിക്കുന്നുണ്ടെന്നും അദ്ദേഹം സൂചിപ്പിച്ചു. പല പദ്ധതികൾക്കും ഫണ്ടിന്റെ കുറവുണ്ടെന്നും മന്ത്രി ചൂണ്ടിക്കാട്ടി.
പിഎം ശ്രീയിൽ സംസ്ഥാന സർക്കാരുകൾക്ക് സിലബസ് നിശ്ചയിക്കാനുള്ള സാഹചര്യം ഉണ്ടാകണമെന്നും അതാണ് കേരളം ഇപ്പോൾ പരിശോധിക്കുന്നതെന്നും മന്ത്രി പറഞ്ഞു. പിഎം ശ്രീയും കേരളത്തിന് കിട്ടാനുള്ള ഫണ്ടും തമ്മിൽ കൂട്ടിക്കുഴയ്ക്കരുതെന്ന് കേന്ദ്രമന്ത്രിയുമായുള്ള ചർച്ചയിൽ താൻ പറഞ്ഞിരുന്നതായും അദ്ദേഹം കൂട്ടിച്ചേർത്തു.
വഖഫ് പുനഃസംഘടനയുമായി ബന്ധപ്പെട്ട് ഇപ്പോൾ യാതൊരു പ്രശ്നവുമില്ലെന്നും വഖഫ് വകുപ്പ് കൈകാര്യം ചെയ്യുന്ന മന്ത്രി പറഞ്ഞു. എല്ലാ കാര്യങ്ങളും ചർച്ചകളിലാണെന്നും ഒരു തർക്കവുമില്ലെന്നും എല്ലാം രമ്യമായി പരിഹരിക്കപ്പെടുമെന്നും അദ്ദേഹം പറഞ്ഞു. ഹജ്ജ് കമ്മിറ്റി അതിന്റെ സമയമാകുമ്പോൾ പുനഃസംഘടിപ്പിക്കുമെന്നും ചെറിയ മാറ്റങ്ങൾ ഉണ്ടായേക്കാമെന്നും മന്ത്രി വ്യക്തമാക്കി. എല്ലാവരെയും വിശ്വാസത്തിലെടുത്താണ് സർക്കാർ മുന്നോട്ടുപോകുന്നതെന്നും അദ്ദേഹം അറിയിച്ചു.