മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാഹുല്‍ ഗാന്ധിയുടെ നേതൃത്വത്തില്‍ പ്രതിപക്ഷ എംപിമാർ നടത്തിയ മാർച്ചില്‍ വൻ സംഘർഷം.ജന്തർ മന്തറിലേക്ക് നീങ്ങിയ എംപിമാരെ പൊലിസ് തടഞ്ഞതോടെയാണ് നാടകീയ രംഗങ്ങള്‍ അരങ്ങേറിയത്.
കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെ ഒരുക്കിയ ഐക്യദാർഢ്യ ലഞ്ചിന് പിന്നാലെയാണ് എംപിമാർ മൂന്ന് ബസുകളിലായി ജൻപഥില്‍ നിന്ന് ജന്തർ മന്തറിലേക്ക് തിരിച്ചത്. എന്നാല്‍ ജന്തർ മന്തറിന് സമീപം പൊലിസ് ബാരിക്കേഡ് തീർത്ത് ബസുകള്‍ തടഞ്ഞു. ഇതോടെ പ്രവർത്തകരും സുരക്ഷാ ഉദ്യോഗസ്ഥരും തമ്മില്‍ സംഘർഷാവസ്ഥയുണ്ടായി.
പൊലിസ് ബലപ്രയോഗത്തിലൂടെ നിരവധി പ്രവർത്തകരെ നീക്കുകയും കസ്റ്റഡിയിലെടുക്കുകയും ചെയ്തു. പ്രതിഷേധത്തിനിടെ പ്രിയങ്ക ഗാന്ധി റോഡില്‍ കിടന്ന് പ്രതിഷേധിച്ചു. തുടർന്ന് രാഹുല്‍ ഗാന്ധിയെയും പ്രിയങ്ക ഗാന്ധിയെയും പൊലിസ് കസ്റ്റഡിയിലെടുത്തു.
കോണ്‍ഗ്രസ്, തൃണമൂല്‍ കോണ്‍ഗ്രസ്, സിപിഐഎം, സിപിഐ, ആർജെഡി തുടങ്ങിയ കക്ഷികളുടെ എംപിമാരാണ് പ്രതിഷേധത്തില്‍ പങ്കെടുത്തത്. സമാജ്വാദി പാർട്ടി എംപിമാർ മാർച്ചില്‍ പങ്കെടുത്തില്ല. ഗ്യാനേഷ് കുമാർ നിയമപരമായി തെരഞ്ഞെടുക്കപ്പെട്ട തെരഞ്ഞെടുപ്പ് കമ്മീഷണറല്ലെന്ന് രാഹുല്‍ ഗാന്ധി പറഞ്ഞു.