സംസ്ഥാനത്ത് വൈദ്യുതി നിയന്ത്രണം ഏർപ്പെടുത്തുകയാണെങ്കില്, ഏതൊക്കെ ഫീഡറുകളില് ഏത് സമയത്താണ് വൈദ്യുതി വിഛേദിക്കുകയെന്ന വിവരം തലേദിവസം തന്നെ ഉപയോക്താക്കളെ അറിയിക്കണമെന്ന് സംസ്ഥാന വൈദ്യുതി റഗുലേറ്ററി കമ്മീഷൻ കെഎസ്ഇബിക്ക് നിർദേശം നല്കി.
മുൻകൂട്ടി അറിയിപ്പില്ലാതെ ക്രമരഹിതമായി ഏർപ്പെടുത്തുന്ന ലോഡ്ഷെഡിംഗ് ജനങ്ങള്ക്കുണ്ടാക്കുന്ന ബുദ്ധിമുട്ടുകളില് കടുത്ത ആശങ്ക രേഖപ്പെടുത്തിക്കൊണ്ടാണ് കമ്മീഷന്റെ ഈ ഇടപെടല്. ഓരോ ദിവസത്തെയും വൈദ്യുതി ആവശ്യവും ലഭ്യമാകുന്ന വൈദ്യുതിയുടെ അളവും തലേദിവസം തന്നെ കൃത്യമായി കണക്കാക്കാൻ സാധിക്കുമെന്ന് കമ്മീഷൻ ചൂണ്ടിക്കാട്ടി.
ഡേ എഹെഡ് മാർക്കറ്റ് ഉള്പ്പെടെയുള്ള വിവിധ സ്രോതസുകളില് നിന്നുള്ള വൈദ്യുതി ലഭ്യതയും കാലാവസ്ഥാ വ്യതിയാനങ്ങളും തലേന്നുതന്നെ അറിയാനാകും. തത്സമയ വിപണിയിലെ വൈദ്യുതി ലഭ്യതയില് മാത്രമാണ് നേരിയ അനിശ്ചിതത്വമുള്ളത്. അതുകൊണ്ട് തന്നെ ലോഡ് ഷെഡിംഗ് ആവശ്യമായി വരികയാണെങ്കില്, ഓരോ ഫീഡറിലെയും നിയന്ത്രണ സമയം തലേദിവസം വൈകുന്നേരം അഞ്ചോടെ തീരുമാനിച്ച് ഉപയോക്താക്കളെ അറിയിക്കണം.
തത്സമയ വിപണിയില് നിന്ന് കൂടുതല് വൈദ്യുതി ലഭ്യമാകുന്ന മുറയ്ക്ക് നിയന്ത്രണത്തിന്റെ ദൈർഘ്യം കുറയ്ക്കാനും കെഎസ്ഇബിക്ക് സാധിക്കും. ഒരു ഫീഡറില് നിയന്ത്രണത്തിനായി ഒരു നിശ്ചിത സമയം നിശ്ചയിച്ചാല്, അടുത്ത ഒന്നോ രണ്ടോ ആഴ്ചകളില് നിയന്ത്രണം വേണ്ടിവരുമ്പോഴെല്ലാം ഇതേ സമയക്രമം തന്നെ പാലിക്കണം. അടിക്കടി ലോഡ് ഷെഡിംഗ് സമയത്തില് മാറ്റം വരുത്തുന്നത് ജനങ്ങളെ ബുദ്ധിമുട്ടിലാക്കും. കെഎസ്ഇബിയുടെ ഭാഗത്തുനിന്നുണ്ടാകുന്ന ഇത്തരം നിയന്ത്രണങ്ങള് കൂടുതല് യുക്തിസഹമാക്കി ജനങ്ങളുടെ ബുദ്ധിമുട്ടുകള് പരമാവധി കുറയ്ക്കാൻ ബോർഡ് അടിയന്തരമായി തയാറാകണമെന്നും റഗുലേറ്ററി കമ്മീഷൻ നിർദേശിച്ചു.