ദുബായ് : ഐസിസി ചാമ്ബ്യന്സ് ട്രോഫിയില് പാകിസ്താനെ തോല്പിച്ച് ടീം ഇന്ത്യ. വിരാട് കോഹ്ലിയുടെ സെഞ്ചുറിക്കരുത്തില് ആറ് വിക്കറ്റിനാണ് ഇന്ത്യന് ജയം. ജയത്തോടെ ഇന്ത്യ സെമി ഏറക്കുറെ ഉറപ്പിച്ചപ്പോള് പാകിസ്താന്റെ സാധ്യതകള് മങ്ങിയിരിക്കുകയായാണ്. ആദ്യം ബാറ്റ് ചെയ്ത് പാകിസ്താന് ഉയര്ത്തിയ 242 റണ്സ് വിജയലക്ഷ്യം ഇന്ത്യ മൂന്ന് വിക്കറ്റ് മാത്രം നഷ്ടത്തില് 42.3 ഓവറില് മറികടന്നു.
മികച്ച തുടക്കത്തിന് ശേഷം രോഹിത് ശര്മ്മ ഷഹീന് അഫ്രീദിക്ക് മുന്നില് വീണെങ്കിലും വിരാട് കോഹ്ലി, ശുഭ്മാന് ഗില്ലിനെയും ശ്രേയസ് അയ്യരെയും കൂട്ടുപിടിച്ച് ഇന്ത്യയെ ലക്ഷ്യത്തിലെത്തിക്കുകയായിരുന്നു. 111 പന്തില് ഏഴ് ബൗണ്ടറികളോടെയായിരുന്നു കോഹ്ലിയുടെ ഏകദിനത്തിലെ 51ാം സെഞ്ച്വറി. തുടക്കം മുതല് ഇന്ത്യന് ബൗളര്മാര്ക്ക് മുന്നില് പതറിയ പാക് ഇന്നിങ്സ് 241ല് ഒതുങ്ങി. കുല്ദീപ് യാദവ് മൂന്ന് വിക്കറ്റെടുത്തപ്പോള് ഹാര്ദിക് പണ്ഡ്യ രണ്ട് വിക്കറ്റ് നേടി.