വനിതകള്‍ക്കായി തിരുവിതാംകൂര്‍ ദേവസ്വം ബോര്‍ഡ് നിര്‍മ്മിച്ച വിശ്രമ കേന്ദ്രം (ഫെസിലിറ്റേഷന്‍ സെന്റര്‍) ബോര്‍ഡ് പ്രസിഡന്റ് പി എസ് പ്രശാന്ത് ഉദ്ഘാടനം ചെയ്തു. പമ്ബയില്‍ സ്ത്രീകള്‍ക്ക് ഒരു വിശ്രമ കേന്ദ്രം വേണമെന്ന വർഷങ്ങളായുള്ള ആവശ്യത്തിനാണ് അങ്ങനെ പരിഹാരമായത്.പമ്ബയില്‍ ഗണപതി ക്ഷേത്രത്തിന് സമീപമാണ് സ്ത്രീകള്‍ക്കായുളള വിശ്രമ കേന്ദ്രം ഒരുങ്ങിയിരിക്കുന്നത്. ഒരേ സമയം 50 സ്ത്രീകള്‍ക്ക് വരെ വിശ്രമ കേന്ദ്ര ഉപയോഗിക്കാം. ആയിരം സ്‌ക്വയര്‍ ഫീറ്റില്‍ ശീതീകരിച്ച ഫെസിലിറ്റേഷനോട് കൂടിയാണ് നിര്‍മാണം പൂര്‍ത്തിയാക്കിയിരിക്കുന്നത്. റെസ്റ്റ് റും, ഫീഡിങ് റൂം, ടോയ്‌ലറ്റ് ബ്ലോക്ക് എന്നിവയും ഉള്‍പ്പെടുന്നുണ്ട്.
വര്‍ഷങ്ങളായി പമ്ബയില്‍ വനിതകള്‍ക്കായി ഒരു വിശ്രമകേന്ദ്രം എന്ന ആവശ്യം ഉയരുന്നുണ്ട്. തീര്‍ത്ഥാടകര്‍ക്ക് ഒപ്പം പമ്ബയില്‍ എത്തുന്ന യുവതികള്‍ക്ക് സുഖമായും സുരക്ഷിതമായും വിശ്രമിക്കാന്‍ ഫെസിലിറ്റേഷന്‍ സെന്റര്‍ പ്രവര്‍ത്തനക്ഷമായതോടെ സാധിക്കും. സന്നിധാനത്ത് ചോറൂണിനായി എത്തുന്ന കുഞ്ഞുങ്ങളുടെ അമ്മമാര്‍ക്ക് പമ്ബയില്‍ തങ്ങേണ്ടി വരുമ്ബോഴും ഈ സംവിധാനം പ്രയോജനപ്പെടുത്താന്‍ കഴിയും.