ശബരിമല: തുലാമാസ പൂജകൾക്കായി തുറന്ന ശബരിമലയിൽ അയ്യപ്പ ഭക്തരുടെ ക്രമാതീതമായ തിരക്ക്. മണ്ഡലക്കാലം തുടങ്ങാൻ ഒരു മാസം ബാക്കി നിൽക്കെ തുലാമാസത്തിലെത്തിയ ഭക്തജനങ്ങൾക്ക് ഉണ്ടായ ബുദ്ധിമുട്ടുകൾ ചോദ്യചിഹ്നമായി നിൽക്കുകയാണ്. വെർച്വൽ ക്യൂ വഴി ബുക്ക് ചെയ്ത ഭക്തർ മാത്രമാണ് സന്നിധാനത്ത് എത്തുന്നത്. ബുക്ക് ചെയ്ത അയ്യപ്പ ഭക്തരുടെ എണ്ണത്തിൽ വർധനവ് കണ്ടിട്ടും അധികൃതർ ആവശ്യമായ മുൻകരുതൽ സ്വീകരിക്കാത്തതിനാൽ ക്രമീകരണങ്ങൾ എല്ലാം താളം തെറ്റി.
ഭക്തർക്ക് ദർശനത്തിനായി മണിക്കൂറുകൾ ക്യൂവിൽ നിൽക്കേണ്ടതായി വന്നു. തിരക്ക് മൂലം പമ്പയിലെ പാർക്കിങ്ങ് ഒഴിവാക്കി നിലയ്ക്കലിൽ വാഹനങ്ങൾ തടഞ്ഞതു മൂലം ഭക്തർക്ക് പമ്പയിലേക്ക് എത്തിച്ചേരാൻ ആശ്രയമായ കെഎസ്ആർടിസി ബസുകൾ വേണ്ടത്ര ഇല്ലാത്തതും ഭക്തരെ ബുദ്ധിമുട്ടിലാക്കി. അരവണയുടെ അഭാവവും പ്രകടമായിരുന്നു.