ന്യൂഡല്‍ഹി: രാഷ്ട്രപതിയുടെ അഭിസംബോധനയോടെ പാർലമെന്‍റ് ബജറ്റ് സമ്മേളനത്തിന് തുടക്കമാകും. എട്ടു ദിവസമാണ് പാർലമെന്‍റ് സമ്മേളിക്കുക. വ്യാഴാഴ്ച ധനമന്ത്രി നിർമല സീതാരാമൻ ഇടക്കാല ബജറ്റ് അവതരിപ്പിക്കും. ലോക്സഭ തെരഞ്ഞെടുപ്പിനു മുമ്ബത്തെ അവസാന പാർലമെന്‍റ് സമ്മേളനമാണ് ഇത്. അതേസമയം, 14 എം.പിമാരുടെ സസ്പെൻഷൻ പിൻവലിക്കാൻ തീരുമാനിച്ചിട്ടുണ്ട്.
കഴിഞ്ഞ സമ്മേളനത്തില്‍ ഉയർന്ന ഒച്ചപ്പാടുകളെ തുടർന്നാണ് ഇവരെ സസ്പെൻഡ് ചെയ്തത്. സസ്പെൻഷൻ പിൻവലിക്കണമെന്ന സർക്കാർ അഭ്യർഥന ലോക്സഭ, രാജ്യസഭ അധ്യക്ഷന്മാർ അംഗീകരിച്ചതായി പാർലമെന്‍ററികാര്യ മന്ത്രി പ്രഹ്ലാദ് ജോഷി അറിയിച്ചു. തുടർച്ചയായ പ്രതിപക്ഷ പ്രതിഷേധത്തിനാണ് ശീതകാല പാർലമെന്‍റ് സമ്മേളനം സാക്ഷ്യം വഹിച്ചത്.
സർക്കാറും പ്രതിപക്ഷവുമായുള്ള ഏറ്റുമുട്ടലിനിടയില്‍ 146 എം.പിമാരെയാണ് സസ്പെൻഡ് ചെയ്തത്. ഇതില്‍ 100 പേർ ലോക്സഭാംഗങ്ങളും മറ്റുള്ളവർ രാജ്യസഭാംഗങ്ങളുമാണ്. 14 എം.പിമാരുടെ അച്ചടക്കലംഘനം ഗുരുതരമാണെന്ന നിരീക്ഷണത്തോടെ അവരുടെ സസ്പെൻഷൻ പിൻവലിക്കുന്ന വിഷയം പ്രിവിലേജസ് കമ്മിറ്റിക്ക് വിട്ടു. അതുകൊണ്ട് സമ്മേളനം തീർന്ന ശേഷവും ഈ സസ്പെൻഷൻ നിലനില്‍ക്കുകയായിരുന്നു. സഭയിലെ മോശം പെരുമാറ്റത്തിന്സ സ്പെൻഷനിലുള്ളവർ പ്രിവിലേജസ് കമ്മിറ്റിയില്‍ ഖേദപ്രകടനം നടത്തിയതോടെയാണ് തിരിച്ചെടുക്കല്‍.