മാഹി: കോടിയേരി മുളിയില്‍നടയില്‍ ഓടിക്കൊണ്ടിരിക്കുന്ന കാറിനു തീപിടിച്ചു. ഓട്ടത്തിനിടയില്‍ പുക ഉയരുന്നത് ശ്രദ്ധയില്‍പ്പെട്ട ഉടൻ യാത്രക്കാർ കാറില്‍നിന്ന് ഇറങ്ങിയതിനാല്‍ വൻ ദുരന്തം ഒഴിവായി. പുലർച്ചെ 5.30 നായിരുന്നു സംഭവം നടന്നത്.
തലശേരി ഭാഗത്തുനിന്നു കോടിയേരി വഴി പന്തക്കല്‍ ഭാഗത്തേക്ക് പോകുകയായിരുന്നു കാർ. ഭാര്യയും ഭർത്താവും കുട്ടികളും ഉള്‍പ്പെട്ട കുടുംബം യാത്ര ചെയ്ത കാറാണ് കത്തിനശിച്ചത്. പരിസരവാസികള്‍ തലശേരി അഗ്നിരക്ഷാ സേനയെ വിവരമറിയിക്കുകയും ഇവരെത്തി തീ അണയ്ക്കുകയുമായിരുന്നു. കാറിന്‍റെ മുക്കാല്‍ ഭാഗവും കത്തിനശിച്ചു. ന്യൂമാഹി പോലീസും സംഭവ സ്ഥലത്തെത്തി.