പെരുമ്പാവൂർ: ഓപ്പറേഷൻ ക്ലീൻ പെരുമ്പാവൂർ എന്ന പദ്ധതിയുടെ ഭാഗമായി നടത്തിയ പോലീസ് പരിശോധനയിൽ രണ്ട് ഇതരസംസ്ഥാന തൊഴിലാളികളെ ഹെറോയിനുമായി പിടികൂടി. വില്പനയ്ക്കായി കൊണ്ടുവന്ന 63കുപ്പി ഹെറോയിനൊപ്പം കഴിഞ്ഞ വെള്ളിയാഴ്ച ആലുവ കെഎസ്ആർടിസി ബസ്റ്റാൻഡിൽ നിന്നും മോഷ്ടിച്ച 45,000 രൂപ വിലവരുന്ന ആപ്പിൾ മൊബൈൽ ഫോണും പോലീസ് പിടിച്ചെടുത്തു.
ആസാം നൗഗാവ് ബുർബണ്ട സ്വദേശി ആരിഫുൾ ഇസ്ലാം, അൽഫിക്കുസ് സമാൻ എന്നിവരാണ് പെരുമ്പാവൂർ എഎസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘത്തിന്റെ കസ്റ്റഡിയിൽ ഉള്ളത്. ആസാമിൽ നിന്നും ട്രെയിൻ മാർഗ്ഗം എത്തിക്കുന്ന ഹെറോയിൻ കുപ്പികളിലാക്കി 1000രൂപക്ക് വിൽപ്പന നടത്തിയിരുന്ന ഇവരെ പോലീസിനു ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പെരുമ്പാവൂർ കാലിചന്ത ഭാഗത്ത് നിന്നും പിടികൂടിയത്.