ഇടുക്കി: എറണാകുളം -കുമളി കെഎസ്ആർടിസി ബസിൽ നഗ്നതാ പ്രദർശനം നടത്തിയ തൃശൂർ സ്വദേശിയായ യുവാവിനെ ഇടുക്കി തങ്കമണി പൊലീസ് അറസ്റ്റു ചെയ്തു. സംഭവം നടന്ന കെഎസ്ആർടിസി ബസിൽ, തൃശ്ശൂർ കൊടകര സ്വദേശിയായ സിജു കട്ടപ്പനയിലേക്കു പോകുന്നതിനു വേണ്ടി പെരുമ്പാവൂരിൽ നിന്നാണ് കയറിയത്. ബസിലെ യാത്രക്കാരിയായ പെൺകുട്ടിക്കു സമീപം ഇരുന്നവർ നേര്യമംഗലം കഴിഞ്ഞപ്പോൾ ഇറങ്ങിയതിനെ തുടർന്നാണ് സിജു ഈ പെൺകുട്ടിക്ക് സമീപം വന്നിരുന്നത്.
തങ്കമണിക്ക് സമീപം പാണ്ടിപ്പാറയിലെത്തിയപ്പോൾ ഇയാൾ നഗ്നത പ്രദർശനം നടത്തിയെന്ന ആരോപണവുമായി പെൺകുട്ടി ചോദ്യം ചെയ്യുകയും, ബഹളം കേട്ട് ബസ് ജീവനക്കാരും സഹയാത്രികരും ഇടപെട്ട് ബസ് തങ്കമണി പോലീസ് സ്റ്റേഷനിലെത്തിച്ചു. തുടർന്ന് പെൺകുട്ടിയുടെ പരാതിയുടെ അടിസ്ഥാനത്തിൽ സിജുവിനെ ചോദ്യം ചെയ്ത ശേഷം അറസ്റ്റ് രേഖപ്പെടുത്തുകയായിരുന്നു. അതേ സമയം നഗ്നത പ്രദർശനം നടത്തിയിട്ടില്ലെന്നാണ് യുവാവിന്റെ പ്രതികരണം.