കൊച്ചി: എറണാകുളം വിദ്യാഭ്യാസ ജില്ലയിലെ കേരളാ സിലബസ് പ്രകാരമുള്ള എല്ലാ വിദ്യാലയങ്ങള്‍ക്കും തിങ്കളാഴ്ച അവധി. പ്രീപ്രൈമറി മുതല്‍ ഹയർസെക്കണ്ടറി വരെയുള്ള സ്കൂളുകള്‍ക്ക് ജില്ലകളക്ടർ അവധി പ്രഖ്യാപിച്ചു. സംസ്ഥാന സ്കൂള്‍ കായികമേളയുടെ സമാപനം കണക്കിലെടുത്താണ് അവധി പ്രഖ്യാപിച്ചത്. സംസ്ഥാന സ്കൂള്‍ കായികമേളയുടെ അവസാന ദിനമായ ഇന്ന് പതിനെട്ട് ഫൈനലുകള്‍. ക്രോസ് കണ്‍ട്രിയോടെയാണ് ഇന്നത്തെ മത്സരങ്ങള്‍ക്ക് തുടക്കമാവുക.
രാവിലെ ഏഴരയ്ക്ക് തുടങ്ങുന്ന സീനിയർ ആണ്‍കുട്ടികളുടെ ഹാമർ ത്രോയാണ് ഫീല്‍ഡിലെ ആദ്യ ഫൈനല്‍. 200 മീറ്റർ ഫൈനലുകള്‍ ഉച്ചയ്ക്ക് രണ്ടിന് തുടങ്ങും. 3.10ന് തുടങ്ങുന്ന 4 ഗുണം 400 മീറ്റർ റിലേ മത്സരങ്ങളോടെ മീറ്റ് സമാപിക്കും. അതേസമയം, കായിക മേളയില്‍ സ്വർണ വേട്ടയില്‍ പാലക്കാട് തിരിച്ചു വരുന്നു. സ്വർണക്കൊയ്ത്തില്‍ ഇഞ്ചോടിഞ്ച് പോരാട്ടം.
ഗെയിംസ് വിഭാഗത്തില്‍ 1213 പോയിന്റുമായി തിരുവനന്തപുരത്തിനു കിരീടം. ട്രാക് ഇനങ്ങളില്‍ സ്വർണ വേട്ടയില്‍ പാലക്കാടാണ് മുന്നില്‍ നില്‍ക്കുന്നത്. 18 സ്വർണമാണ് ഇതുവരെ പാലക്കാട് സ്വന്തമാക്കിയത്. അതേസമയം, പോയിന്റ് നിലയില്‍ മലപ്പുറം ജില്ലയാണ് ഒന്നാമത് നിക്കുന്നത്. അത്‌ലറ്റിക്സില്‍ ട്രിപ്പിള്‍ സ്വർണ്ണം നേടി പാലക്കാടിന്റെ എം അമൃത്. 1500 മീറ്ററിലാണ് ഇന്ന് അമൃതിന്റെ മെഡല്‍ നേട്ടം.
പാലക്കാട് GHSS കൊടുവായൂർ സ്കൂളിലെ കെ.എ നിവേദ്യയും മീറ്റിലെ മെഡല്‍ നേട്ടം മൂന്നാക്കി. നാലാം ദിനവും കുതിപ്പ് തുടരുന്ന മലപ്പുറം 147 പോയിന്റുമായി ഒന്നാമതാണ്. 105 പോയിന്റുമായി പാലക്കാടാണ് രണ്ടാമത്. ജൂനിയർ ആണ്‍കുട്ടികളുടെ 1500 മീറ്ററില്‍ പാലക്കാട് കല്ലടി സ്കൂളിലെ എം അമൃത് ഒന്നാമതെത്തിയതോടെ മീറ്റിലെ ആദ്യ ട്രിപ്പിള്‍ സ്വർണ്ണമെഡല്‍ ജേതാവായി. 400 മീറ്ററിലും 800 മീറ്ററിലും അമൃത് സ്വർണ്ണം നേടിയിരുന്നു. നാലാം ദിനം ആദ്യ മീറ്റ് റെക്കോർഡ് സ്വന്തമാക്കിയത് മലപ്പുറം ചീക്കോട് സ്കൂളിലെ മുഹമ്മദ് അമീനാണ്.
സീനിയർ വിഭാഗം 1500 മീറ്ററിലാണ് അമീനിന്റെ സ്വർണനേട്ടം സീനിയർ ആണ്‍കുട്ടികളുടെ ഷോട്ട് പുട്ടില്‍ കാസർകോടിന്റെ കെ.സി സർവാൻ മീറ്റ് റെക്കോർഡോടെ സ്വർണ്ണം നേടി. 17.74 മീറ്റർ മറികടന്ന സർവാൻ സ്വന്തം പേരിലുള്ള റെക്കോർഡ് തിരുത്തി. 1500 മീറ്റർ പെണ്‍കുട്ടികളുടെ മത്സരത്തില്‍ സീനിയർ വിഭാഗത്തില്‍ എറണാകുളത്തിന്റെ സി.ആർ നിത്യയും ജൂനിയർ വിഭാഗത്തില്‍ പാലക്കാടിന്റെ കെ.എ നിവേദ്യയും ഒന്നാമതെത്തി.
600 മീറ്റർ സബ് ജൂനിയർ വിഭാഗത്തില്‍ ആലപ്പുഴയുടെ കെ യു അർജുനും കോഴിക്കോടിന്റെ അല്‍ക്ക ഷിനോജും സ്വർണം നേടി. സബ് ജൂനിയർ ആണ്‍കുട്ടികളുടെ ഡിസ്കസ് ത്രോയില്‍ പാലക്കാടിന്റെ വി കെ സാകേത് സ്വർണ്ണം എറിഞ്ഞിട്ടു. ജൂനിയർ പെണ്‍കുട്ടികളുടെ ലോങ് ജമ്ബില്‍ പാലക്കാടിന്റെ എസ് അനന്യക്കാണ് സ്വർണം.