തൃശൂര്‍: യുവതിയുടെ മോര്‍ഫ്‌ ചെയ്‌ത ചിത്രങ്ങള്‍ സാമൂഹിക മാധ്യമങ്ങളില്‍ പ്രചരിപ്പിച്ച തൃശൂര്‍ സ്വദേശിയായ ബൈക്ക്‌ റേസര്‍ തമിഴ്‌നാട്ടില്‍ അറസ്‌റ്റില്‍. ആല്‍ഡ്രിന്‍ ബാബുവാണ്‌ കോയമ്ബത്തൂരില്‍ അറസ്‌റ്റിലായത്‌. ദേശീയതലത്തിലെ മോട്ടോര്‍ സൈക്കിള്‍ റേസിങ്‌ ചാംപ്യന്‍ഷിപ്പുകളില്‍ പങ്കെടുത്തിട്ടുള്ള ആല്‍ഡ്രിന്‍ ബാബുവും കോയമ്ബത്തൂര്‍ സ്വദേശിയായ യുവതിയും തമ്മില്‍ പ്രണയത്തിലായിരുന്നു. രണ്ടുവര്‍ഷം മുമ്ബ്‌ ഇരുവരും വേര്‍പിരിഞ്ഞു. ബന്ധം തുടരണമെന്ന്‌ ആല്‍ഡ്രിന്‍ ആവശ്യപ്പെട്ടെങ്കിലും യുവതി തയാറായില്ല. തുടര്‍ന്നാണ്‌ യുവതിയുടെ മോര്‍ഫ്‌ ചെയ്‌ത നഗ്നചിത്രങ്ങള്‍ ആല്‍ഡ്രിന്‍ സാമൂഹിക മാധ്യമങ്ങളില്‍ പ്രചരിപ്പിച്ചത്‌.
തന്റെ പേരിലുള്ള വ്യാജ ഇന്‍സ്‌റ്റഗ്രാം അക്കൗണ്ടിലൂടെ അശ്ലീല ചിത്രങ്ങള്‍ പ്രചരിപ്പിക്കുന്നതായി കാണിച്ച്‌ യുവതി കഴിഞ്ഞ മാസം കോയമ്ബത്തൂര്‍ സൈബര്‍ ക്രൈം പോലീസില്‍ പരാതി നല്‍കി. ഐ.പി. അഡ്രസ്‌ പിന്തുടര്‍ന്ന്‌ നടത്തിയ അന്വേഷണത്തിലാണ്‌ ആല്‍ഡ്രിന്റെ മൊബൈല്‍ ഫോണില്‍നിന്നു ചിത്രങ്ങള്‍ അപ്‌ലോഡ്‌ ചെയ്‌തതായി കണ്ടെത്തിയത്‌. തുടര്‍ന്ന്‌ ആല്‍ഡ്രിനെ കസ്‌റ്റഡിയിലെടുത്തു, ചോദ്യം ചെയ്യലില്‍ ആല്‍ഡ്രിന്‍ കുറ്റം സമ്മതിച്ചതായും മൊബൈല്‍ ഫോണും ലാപ്‌ടോപ്പും കണ്ടെത്തിയെന്നും പോലീസ്‌ അറിയിച്ചു. കോയമ്ബത്തൂര്‍ സെന്‍ട്രല്‍ ജയിലിലുള്ള ആല്‍ഡ്രിന്റെ ജാമ്യാപേക്ഷ കോടതി തള്ളി.