പത്തനംതിട്ട: പത്തനംതിട്ടയില്‍ വന്‍ കഞ്ചാവ് വേട്ട. മണ്ണാറമലയിലെ വീട്ടില്‍ നിന്ന് പൊലീസ് നൂറു കിലോയില്‍ അധികം കഞ്ചാവ് പിടികൂടി. മൂന്നു പേരെ പൊലീസ് കസ്റ്റഡിയിലെടുത്തു. സലിം, ജോയല്‍, ഉബൈദ് എന്നിവരാണ് പിടിയിലായത്. വീട് വാടകയ്‌ക്കെടുത്താണ് കഞ്ചാവ് വില്‍പ്പന നടത്തിയിരുന്നതെന്ന് പൊലീസ് സൂചിപ്പിച്ചു. പത്തനംതിട്ട പൊലീസ്, ഡാന്‍സാഫ് ടീം തുടങ്ങിയവരുടെ നേതൃത്വത്തിലാണ് കഞ്ചാവ് പിടികൂടിയത്. ഇത്രയധികം കഞ്ചാവ് എത്തിച്ചതിനു പിന്നില്‍ വന്‍ ശൃംഖല തന്നെ പിടികൂടിയവര്‍ക്കു പിന്നിലുണ്ടെന്നാണ് അന്വേഷണ സംഘത്തിന്റെ നിഗമനം. കസ്റ്റഡിയിലെടുത്തവരെ ചോദ്യം ചെയ്തുവരികയാണെന്ന് പൊലീസ് അധികൃതര്‍ സൂചിപ്പിച്ചു.