വയോജന പരിപാലന മേഖലയില്‍ ഇടപെടലുകള്‍ ശക്തമാക്കുമെന്ന് ഉന്നതവിദ്യാഭ്യാസ- സാമൂഹിക നീതി വകുപ്പ് മന്ത്രി ഡോ.ആർ ബിന്ദു പറഞ്ഞു. തിരുവനന്തപുരം ഐ എം ജിയില്‍ നടന്ന സംസ്ഥാന വയോജന കൗണ്‍സിലിലെയും, ജില്ലാതല വയോജന കമ്മിറ്റിയിലെയും അംഗങ്ങള്‍ക്കായുള്ള ഏകദിന പരിശീലന പരിപാടി ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. ജനസംഖ്യയില്‍ വയോജനങ്ങളുടെ എണ്ണം വർധിക്കുന്ന സാഹചര്യത്തില്‍ ആരോഗ്യ ക്ഷേമപ്രവർത്തനങ്ങള്‍ ലഭ്യമാക്കണം.
2030 ഓടെ ജനസംഖ്യയുടെ 25% വയോജനങ്ങളായിരിക്കുമെന്നാണ് പ്രതീക്ഷ. കുടുംബ ഘടനയുടെ മാറ്റങ്ങള്‍ക്കനുസരിച്ച്‌ വയോജനങ്ങള്‍ പീഡിതരാകുന്ന സാഹചര്യം നിലനില്‍ക്കുന്നു. ജീവിതത്തിന്റെ നല്ല ഭാഗം സമൂഹത്തിനും കുടുംബത്തിനും വേണ്ടി നീക്കി വെച്ച മനുഷ്യരുടെ ക്ഷേമം നമ്മുടെ ബാധ്യതയാണ്. മുതിർന്ന പൗരൻമാരുടെയും രക്ഷിതാക്കളെയും സംബന്ധിച്ച നിലനില്‍ക്കുന്ന നിയമ വ്യസ്ഥകളെക്കുറിച്ച്‌ നമുക്ക് ധാരണയുണ്ടാകണം. വയോജന കൗണ്‍സിലുകളുടെ സേവനം സംസ്ഥാന വ്യാപകമാക്കണം.
വീടിനുള്ളില്‍ തളച്ചിടപ്പെട്ട ഒരോ വ്യക്തിയുടെയും പ്രശ്‌നങ്ങള്‍ തിരിച്ചറിയാൻ കഴിയണ്ടതുണ്ട്.വിവിധ പദ്ധതികള്‍ നടപ്പിലാക്കുന്നതോടൊപ്പം ഓർഫണേജുകള്‍ക്ക് ഗ്രാൻഡുകളടക്കം സർക്കാർ നല്‍കി വരുന്നു. കാലാനുസൃതമായി സർക്കാർ വൃദ്ധസദനങ്ങളുടെ അടിസ്ഥാന സൗകര്യങ്ങള്‍ വികസിപ്പിക്കുന്നതിനായാണ് സെക്കൻഡ് ഇന്നിങ്‌സ് പദ്ധതിയിലൂടെ ഉദ്ദേശിക്കുന്നത്. സാമൂഹിക നീതി ഓഫീസർമാക്ക് അടിയന്തര സാഹചര്യത്തില്‍ 25,000 രൂപ ചെലവഴിക്കാമെന്ന ഉത്തരവ് നിലവില്‍ വന്നു കഴിഞ്ഞു.
വയോജന ക്ലബ്ലുകള്‍,ഓർമ ക്ലിനിക്കുകള്‍ എന്നിവ വ്യാപകമാക്കും. വയോജനങ്ങള്‍ക്കായുള്ള ഉത്തരവാദിത്തങ്ങള്‍ ഏറ്റെടുക്കുന്നതില്‍ എല്ലാ വകുപ്പുകളും നിലവില്‍ ഊർജ്വ സ്വലമായി പ്രവർത്തിക്കുന്നുണ്ടെന്നും മന്ത്രി പറഞ്ഞു. സാമൂഹിക നീതി വകുപ്പ് അഡീഷണല്‍ ഡയറക്ടർ ജലജ എസ് അധ്യക്ഷത വഹിച്ച യോഗത്തില്‍ സംസ്ഥാന വയോജന കൗണ്‍സില്‍ കണ്‍വീനർ അമരവിള രാമകൃഷ്ണൻ, സാമൂഹികനീതി വകുപ്പ് അസിസ്റ്റന്റ് ഡയറക്ടർ, പ്രീതി വില്‍സണ്‍ എന്നിവർ സംബന്ധിച്ചു.