കോഴിക്കോട്: മലബാറിലെ പ്ലസ് വണ്‍ സീറ്റ് ക്ഷാമത്തില്‍ മുസ്‍ലിം ലീഗ് പ്രക്ഷോഭത്തിന് മേയ് 29ന് മലബാർ ജില്ലകളിലെ കലക്ടറേറ്റുകള്‍ക്ക് മുന്നില്‍ പ്രതിഷേധ സമരം നടത്തുമെന്ന് നേതൃയോഗശേഷം നടത്തിയ വാർത്തസമ്മേളനത്തില്‍ ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടിയും സംസ്ഥാന ജനറല്‍ സെക്രട്ടറി പി.എം.എ. സലാമും വ്യക്തമാക്കി. മലബാറിലെ ജില്ലകളില്‍ അരലക്ഷത്തോളം സീറ്റുകളുടെ കുറവുണ്ട്. സീറ്റ് വർധിപ്പിക്കുന്നതിനുപകരം ബാച്ചുകള്‍ കൂട്ടുകയാണ് വേണ്ടത്. ഇക്കാര്യത്തില്‍ വിദ്യാഭ്യാസ മന്ത്രിയുടെ നിലപാട് അംഗീകരിക്കാനാവില്ല. കലക്ടറേറ്റ് സമരത്തിനുശേഷവും പരിഹാരമില്ലെങ്കില്‍ അടുത്തഘട്ടം ആലോചിക്കുമെന്നും നേതാക്കള്‍ പറഞ്ഞു.