ഗൂഡല്ലൂർ: വീടിനു സമീപത്തെ പറമ്പിൽ ഇറങ്ങിയ വീട്ടമ്മയെ കാട്ടാന ചവിട്ടിക്കൊന്നു. ഗൂഡല്ലൂർ അയ്യൻകൊല്ലി കൊളപ്പള്ളിയ്ക്കടുത്ത് വട്ടക്കൊല്ലി തട്ടാൻ പാറ മുരിക്കൻചേരിയിലെ നാഗമ്മാൾ (72) ആണ് കാട്ടാനയുടെ ആക്രമണത്തിൽ മരിച്ചത്. അപ്രതീക്ഷിതമായി തൊടിയിൽ ആനയെക്കണ്ട നാഗമ്മാൾ ഓടി രക്ഷപ്പെടാൻ ശ്രമിച്ചെങ്കിലും കാട്ടാന തുമ്പിക്കൈയിൽ പിടികൂടി കൊലപ്പെടുത്തുകയായിരുന്നു.
തുടർന്ന് ഓടിയെത്തിയ നാട്ടുകാർ ശബ്ദമുണ്ടാക്കി ആനയെ തുരത്തിയതിനു ശേഷം വീട്ടമ്മയെ പന്തല്ലൂർ താലൂക്ക് ആശുപത്രിയിൽ എത്തിച്ചെങ്കിലും മരിച്ചിരുന്നു. ആറു മാസത്തിനുള്ളിൽ കാട്ടാനയുടെ ആക്രമണത്തിൽ മരണപ്പെടുന്ന ആറാമത്തെ ആളാണിത്.