വെണ്മണി: ഒന്‍പതു ഗ്രാം എം.ഡി.എം.എയുമായി 19 കാരന്‍ അറസ്‌റ്റില്‍. കൊല്ലകടവ്‌ വരിക്കോലില്‍ തെക്കേതില്‍ അപ്പുവാണ്‌ അറസ്‌റ്റിലായത്‌. ജില്ലാ ലഹരി വിരുദ്ധ സ്‌ക്വാഡും വെണ്മണി പോലീസും സംയുക്‌തമായി നടത്തിയ പരിശോധനയിലാണ്‌ ഇയാള്‍ പിടിയിലായത്‌.
മാസങ്ങളായി ബംഗളുരുവില്‍ നിന്നും എം.ഡി.എം.എ നാട്ടിലെത്തിച്ച്‌ വില്‍പന നടത്തി വരികയായിരുന്നു. കഴിഞ്ഞ കുറേ മാസങ്ങളായി ലഹരി വസ്‌തുക്കള്‍ കേരളത്തിന്‌ പുറത്തു പോയി വാങ്ങി നാട്ടില്‍ എത്തിക്കുന്നെന്ന്‌ ജില്ലാ പോലീസിന്‌ ലഭിച്ച രഹസ്യവിവരത്തിന്റെ അടിസ്‌ഥാനത്തില്‍ ഇയാളെ പോലീസ്‌ രഹസ്യമായി നിരീക്ഷിച്ചു വരികയായിരുന്നു. പഠിക്കുന്ന കാര്യം അന്വേഷിക്കാന്‍ എന്ന വ്യാജേനയാണ്‌ ഇയാള്‍ ബംഗ്‌ളുരുവില്‍ പോയി വന്നിരുന്നത്‌. ഇയാള്‍ ലഹരി ഇവിടെ എത്തിക്കുന്ന ഒരു ഏജന്റ്‌ മാത്രമാണോ എന്നും കുടുതല്‍ ആളുകളെ കേന്ദ്രീകരിച്ച്‌ അന്വേഷണം തുടരുന്നതായും പോലീസ്‌ പറഞ്ഞു.
ജില്ലാ ലഹരി വിരുദ്ധ സ്‌ക്വാഡ്‌ ഡി.വൈ.എസ്‌.പി: പങ്കജാക്ഷന്റെ നേതൃത്വത്തിലുള്ള ലഹരി വിരുദ്ധ സ്‌ക്വാഡും ഡി.വൈ.എസ്‌.പി: കെ.എന്‍.രാജേഷിന്റെ നേതൃത്വത്തില്‍ വെണ്മണി എസ്‌.ഐ: ദിജേഷ്‌, സീനിയര്‍ സി.പി.ഒ വിവേക്‌, പത്മരാജന്‍, സനല്‍കുമാര്‍ എന്നിവര്‍ ചേര്‍ന്നാണ്‌ ഇയാളെ പിടികുടിയത്‌.