‘എച്ച്‌-ടെസ്റ്റ്’ ഉപയോഗിച്ച്‌ ലൈസൻസ് നേടുന്നത് ഉടൻ തന്നെ പഴയ കാര്യമായി മാറും. ഇനി മുതല്‍ വാഹനം ഓടിക്കുകയും നിര്‍ത്തുകയും സ്റ്റാര്‍ട്ട് ചെയ്യുകയും പാര്‍ക്ക് ചെയ്യുകയും ചെയ്താല്‍ മാത്രമേ ലൈസൻസ് ലഭിക്കൂ. ഇത് സംബന്ധിച്ച സര്‍ക്കാര്‍ ഉത്തരവ് ഉടൻ പുറത്തിറങ്ങും. വാഹനം പാര്‍ക്ക് ചെയ്യുന്നതിന് ടെസ്റ്റ് സൈറ്റില്‍ പ്രത്യേക ബോക്സ് ഉണ്ടാകും. ഇതില്‍ വാഹനം മുന്നിലും പിന്നിലും വശങ്ങളിലും കൃത്യമായി പാര്‍ക്ക് ചെയ്യണം.റോഡില്‍ പാര്‍ക്ക് ചെയ്യുമ്ബോള്‍ പാലിക്കേണ്ട നിയമങ്ങളും പരിശോധിക്കും.
സംസ്ഥാനത്ത് ഡ്രൈവിംഗ് പരിശീലനത്തിനും ലൈസൻസ് ടെസ്റ്റുകള്‍ നടത്തുന്നതിനുമായി കേന്ദ്ര സര്‍ക്കാര്‍ നിര്‍ദ്ദേശിച്ച അംഗീകൃത ഡ്രൈവര്‍ ട്രെയിനിംഗ് സെന്റര്‍ പദ്ധതി ആരംഭിക്കുന്നതിന് മുന്നോടിയായാണ് ഗതാഗത വകുപ്പില്‍ പുതിയ പരിഷ്കാരം. ഒരു ആര്‍ടി ഓഫീസ് പരിധിയിലെ ഡ്രൈവിംഗ് ടെസ്റ്റുകളുടെ എണ്ണം പ്രതിദിനം 20 ആയി കുറയ്ക്കും. ലേണേഴ്‌സ് ടെസ്റ്റിലെ ചോദ്യങ്ങളുടെ എണ്ണം 30 മുതല്‍ 35 വരെയാകാനാണ് നിര്‍ദ്ദേശിച്ചിരിക്കുന്നത്. 80% ഉത്തരങ്ങള്‍ ശരിയാണെങ്കില്‍ മാത്രമേ പരീക്ഷ വിജയിക്കൂ.നിലവില്‍, 20 ചോദ്യങ്ങളില്‍ 12 ശരിയുത്തരങ്ങള്‍ ലഭിച്ചാല്‍ ലൈസൻസ് സര്‍ട്ടിഫിക്കറ്റ് ഉറപ്പാക്കും.
ഡ്രൈവിംഗ് ടെസ്റ്റ് പൂര്‍ണമായും ചിത്രീകരിക്കും. വാഹനത്തിനുള്ളില്‍ ക്യാമറയും ഉണ്ടാകും. വീഡിയോകള്‍ 3 മാസത്തേക്ക് സൂക്ഷിക്കും. ടെസ്റ്റ് നടത്തുന്ന ഉദ്യോഗസ്ഥൻ ഡ്രൈവറെ അധിക്ഷേപിക്കുകയോ ഭീഷണിപ്പെടുത്തുകയോ ചെയ്താല്‍ നടപടിയെടുക്കാനാണിത്