തൃശൂര്‍: സോഷ്യല്‍ മീഡിയ വഴി പരിചയപ്പെട്ട വീട്ടമ്മയുടെ നഗ്ന വീഡിയോ കൈവശമുണ്ടെന്നും പ്രചരിപ്പിക്കുമെന്നും ഭീഷണിപ്പെടുത്തി ബ്ലാക്ക് മെയില്‍ ചെയ്യാന്‍ ശ്രമിച്ച പ്രതി അറസ്റ്റില്‍. അവിണിശേരി ആനക്കല്ല് ഏഴുകമ്ബനി തോണിവളപ്പില്‍ അഭിലാഷിനെ (34)യാണ് അറസ്റ്റ് ചെയ്തത്. ആനക്കല്ല് ജംഗ്ഷനിലുള്ള കാരമല്‍ വെഡിംഗ് സ്റ്റുഡിയോ ഉടമയാണിയാള്‍.
മൂന്നുവര്‍ഷം മുന്‍പാണ് ഇയാള്‍ വീട്ടമ്മയുമായി ഫേസ്ബുക്ക് വഴി സൗഹൃദത്തിലായത്. സൗഹൃദം മുതലെടുത്ത പ്രതി വീട്ടമ്മയുടെ സ്വകാര്യ ദൃശ്യം അവരറിയാതെ പകര്‍ത്തുകയും ഈ ദൃശ്യങ്ങള്‍ കാണിച്ച്‌ വീട്ടമ്മയെ കഴിഞ്ഞ കുറച്ചുനാളുകളായി ഭീഷണിപ്പെടുത്തി ബ്ലാക്ക് മെയില്‍ ചെയ്യുകയുമായിരുന്നു.
ഭീഷണി തുടര്‍ന്നതോടെ വീട്ടമ്മ ഭര്‍ത്താവിനോടു വിവരം പറയുകയും നെടുപുഴ സ്റ്റേഷനില്‍ പരാതി നല്‍കുകയുമായിരുന്നു. തുടര്‍ന്നാണു നെടുപുഴ പോലീസ് കേസെടുത്തതും സ്‌റ്റേഷന്‍ ഇന്‍സ്‌പെക്ടര്‍ ടി.ജി.ദിലീപ് ഇയാളെ അറസ്റ്റു ചെയ്തതും. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.