കൊച്ചി: തൃപ്പൂണിത്തുറ കരിങ്ങാച്ചിറയിൽ നടന്ന വാഹനപരിശോധനയ്ക്കിടെ പോലീസിനെ വെട്ടിച്ച് കടന്നുപോയ കാറിൽ നിന്നും മയക്കുമരുന്ന് പിടികൂടി. കോടികൾ വിലമതിക്കുന്ന 485ഗ്രാം എംഡിഎംഎയാണ് കാറിൽ നിന്നും ഹിൽപാലസ് പോലീസ് കണ്ടെടുത്തത്. സംഭവത്തിൽ നഴ്സിങ് വിദ്യാര്‍ത്ഥിനിയടക്കം രണ്ട് പേരെ അറസ്റ്റ് ചെയ്തു.
വാഹനപരിശോധനക്കിടെ പോലീസിനെ വെട്ടിച്ചുകടന്ന സംഘം രക്ഷപ്പെടാനായി കാർഷോറൂമിലേക്ക് വാഹനം ഓടിച്ചുകയറ്റി. എന്നാൽ പിന്തുടർന്ന് എത്തിയ പോലീസ് ഓടിരക്ഷപ്പെടാൻ ശ്രമിച്ച ഏറ്റുമാനൂര്‍ സ്വദേശി അമീര്‍ മജീദ്, ചങ്ങനാശ്ശേരി സ്വദേശിനി വര്‍ഷ എന്നിവരെ പിടികൂടുകയായിരുന്നു. കൊച്ചിയിലെ ലഹരി മാഫിയ സംഘത്തിനു വേണ്ടിയാണ് ഇവർ മയക്കുമരുന്ന് കടത്താൻ ശ്രമിച്ചതെന്ന് പോലീസ് പറയുന്നു.