പുനലൂര്‍: പുനലൂരില്‍ തീപിടിത്തം. നാലു കടകള്‍ കത്തിനശിച്ചു. പേപ്പര്‍ മില്‍ റോഡില്‍ സെന്റ് ഗരേറ്റി സ്കൂളിന് മുന്നില്‍ ശനിയാഴ്ച പുലര്‍ച്ചെ രണ്ടോടെയായിരുന്നു തീപിടിത്തം. ഫ്രൂട്ട്സ് കട, ഫാൻസി സ്റ്റോര്‍, മൊബൈല്‍ ഷോപ്പ്, ലേഡീസ് ഗാര്‍മെന്റ്സ് എന്നിവയാണ് കത്തിയത്. കുറഞ്ഞത് 35 ലക്ഷം രൂപയുടെ നഷ്ടം കണക്കാക്കുന്നു. ഫ്രൂട്ട്സ് കടയില്‍നിന്നാണ് തീ പടര്‍ന്നതെന്ന് സംശയിക്കുന്നു.
പുലര്‍ച്ചെ അടച്ചിട്ടിരുന്ന കടകളില്‍നിന്ന് തീയും പുകയും ഉയരുന്നത് കണ്ട് വഴിയാത്രക്കാര്‍ പുനലൂര്‍ അഗ്നിരക്ഷാസേനയെയും പൊലീസിനെയും വിവരമറിയിച്ചു. രണ്ട് യൂണിറ്റ് അഗ്നിരക്ഷാസേനാംഗങ്ങള്‍ ഒരു മണിക്കൂറോളം പരിശ്രമിച്ചാണ് തീ സമീപത്തെ മറ്റു കടകളിലേക്ക് പടരുന്നത് തടഞ്ഞത്. കടകള്‍ അടച്ചിട്ടിരുന്നതിനാല്‍ തീ കെടുത്തുന്നതിന് ബുദ്ധിമുട്ട് നേരിട്ടു. നാലു കടകളിലെയും മുഴുവൻ സാധനങ്ങളും കത്തിനശിച്ചു. കടമുറികളും ഭാഗികമായി തകര്‍ന്നു