ഇടുക്കി: പ്രായപൂർത്തിയാകാത്ത പെൺകുട്ടിക്ക് മദ്യം നൽകിയ ശേഷം ലൈംഗികമായി പീഡിപ്പിച്ച സംഭവത്തിൽ മൂന്നു പേർ പോലീസ് കസ്റ്റഡിയിൽ. ഇന്നലെ ഉച്ചകഴിഞ്ഞാണ് ഇടുക്കി നെടുങ്കണ്ടത്ത് വച്ച് സംഭവം നടന്നത്. പെൺകുട്ടിയെ ലൈംഗീകമായി പീഡിപ്പിച്ച ആഷിഖ്, സഹായിച്ച സുഹൃത്ത് അനേഷ്, പ്രായപൂർത്തിയാകാത്ത മറ്റൊരു സുഹൃത്ത് എന്നിവരാണ് നെടുങ്കണ്ടം പൊലീസിൻ്റെ കസ്റ്റഡിയിലുള്ളത്. സുഹൃത്തിന്റെ ക്ഷണപ്രകാരം ഇവർക്കരികിലെത്തിയ പെൺകുട്ടിയെ കൂടിയ അളവിൽ മദ്യം കഴിപ്പിച്ചു. തുടർന്ന് സുഹൃത്തുക്കൾ പോയ സമയത്താണ് ബോധരഹിതയായി കിടന്ന പെൺകുട്ടിയെ ആഷിക് ലൈംഗീകമായി പീഡിപ്പിക്കുകയും മൊബൈൽലിൽ ദൃശ്യങ്ങൾ പകർത്തുകയും ചെയ്തത്.
പിന്നീട് പെൺകുട്ടിയെ കാണാതെ വീട്ടുകാർ അന്വേഷണം തുടങ്ങിയപ്പോഴാണ് ആഷിഖ് സുഹൃത്തുക്കളുടെ സഹായത്തോടെ പെൺകുട്ടിയെ വീട്ടിലെത്തിച്ചത്. പരിക്കേറ്റ നിലയിലുള്ള പെൺകുട്ടിയെ കണ്ട് വീട്ടുകാർ പോലീസിൽ പരാതി നൽകുകയും, ഹോസ്പിറ്റലിൽ പ്രവേശിപ്പിക്കുകയും ചെയ്തു. പോലീസ് അറസ്റ്റ് ചെയ്ത ആഷിഖിന് മേൽ ബലാത്സംഗം, പോക്സോ നിയമം, പട്ടികജാതി- പട്ടികവർഗ്ഗ പീഢനം നിരോധനനിയമം, ഐടി ആക്ട് തുടങ്ങിയ വകുപ്പുകൾ പ്രകാരമാണ് കേസെടുത്തിരിക്കുന്നത്.