കോലഞ്ചേരി: കഴിഞ്ഞ മാസം 27ന് പൂട്ടിക്കിടന്ന വീടിനുള്ളിൽ അതിക്രമിച്ചു കടന്ന് സ്വർണവുമായി കടന്നുകളഞ്ഞ മോഷ്ടാക്കളെ പുത്തൻകുരിശ് പോലീസ് പിടികൂടി. പോലീസ് നടത്തിയ ശാസ്ത്രീയമായ അന്വേഷണത്തിലൂടെയാണ് കൊടുങ്ങല്ലൂരിലെ ഒരു ലോഡ്ജിൽ നിന്നും പ്രതികളായ വടക്കൻപറവൂർ സ്വദേശി നിസാർ, കൊടുങ്ങല്ലൂർ സ്വദേശി ബൈജു എന്നിവരെ കസ്റ്റഡിയിലെടുത്തത്.
കോലഞ്ചേരി കടയിരുപ്പിലെ പൂട്ടിയിട്ട വീട്ടിൽ പ്രതികൾ നടത്തിയ മോഷണം, വീട്ടുകാർ തിരികെയെത്തിയപ്പോഴാണ് അറിഞ്ഞത്. മുൻവാതിൽ പൊളിക്കാൻ നടത്തിയ ശ്രമം വിഫലമായതോടെ രണ്ടാം നിലയിൽ കയറി അവിടെയുള്ള വാതിൽ തകർത്ത് അകത്തു കയറി അലമാരയിൽ നിന്നും 48പവൻ സ്വർണമാണ് പ്രതികൾ മോഷ്ടിച്ചത്. സ്കൂട്ടറിൽ കറങ്ങി നടന്ന് വീടുകൾ കണ്ടു വച്ച് മോഷണം നടത്തുന്ന പ്രതികളുടെ പേരിൽ വിവിധ സ്റ്റേഷനുകളിലായി നിരവധി കേസുകളുണ്ട്.