കോതമംഗലം: വാരപ്പെട്ടിയിലുള്ള പ്ലൈവുഡ് കമ്പനിയിലെ അഞ്ച് ഇതരസംസ്ഥാന തൊഴിലാളികൾ മലയാളിയായ ലോറി ഡ്രൈവറെ ആക്രമിച്ച് പരിക്കേൽപ്പിച്ചു. സംഭവത്തിൽ ആസ്സാം സ്വദേശികളായ ബഹ്റുൽ ഇസ്ലാം, ജനനത്തുൽ ഹക്ക്, മൂർഷിദുൽ ഇസ്ലാം, അനാറുൾ ഇസ്ലാം, ദിൻ ഇസ്ലാം എന്നിവരെ കോതമംഗലം പോലീസ് അറസ്റ്റ് ചെയ്തു. കഴിഞ്ഞ ശനിയാഴ്ച വൈകിട്ട് വാരപ്പെട്ടിയിലുള്ള പ്ലൈവുഡ് കമ്പനിയിൽ ലോഡു കയറ്റുന്നതിന് ലോറിയുമായി എത്തിയ മലപ്പുറം പോത്ത്കല്ല് സ്വദേശിയായ നൗഫലിനാണ് മർദ്ദനമേറ്റത്.
പ്ലൈവുഡ് ലോഡ് ലോറിയിൽ കയറ്റിയതിനെ തുടർന്ന് ലോഡ് പടുതയിട്ട് മൂടി കെട്ടി മുറുക്കുന്ന ജോലി ചെയ്ത അഞ്ച് തൊഴിലാളികളും കൂലി ആവശ്യപ്പെടുകയും, നൽകിയ കെട്ട് കൂലി കുറഞ്ഞ് പോയെന്ന് പറഞ്ഞ് പ്ലൈവുഡ് വേസ്റ്റ് ഉപയോഗിച്ച് ആക്രമണം നടത്തുകയുമായിരുന്നു. ആക്രമണത്തിൽ കാലിന് ഒടിവും, വിവിധ ഭാഗങ്ങളിൽ പരിക്കുകളും ഉണ്ടായതിനെ തുടർന്ന് നൗഫൽ ആശുപത്രിയിൽ ചികിത്സയിലാണ്.