കടയ്ക്കല്‍: കുമ്മിളില്‍ കാമുകിയുമായി ചേർന്ന് ഭാര്യയെ കൊലപ്പെടുത്താൻ ശ്രമിച്ച യുവാവ് പിടിയില്‍. ചിതറ ചല്ലിമുക്ക് ഷൈനി ഭവനില്‍ ജോഷി എന്ന സതീഷ് (37) നെയാണ് കടയ്ക്കല്‍ പൊലീസ് അറസ്റ്റ് ചെയ്തത്. 2024 ജനുവരിയിലാണ് കേസിനാസ്പദമായ സംഭവം.
ഭാര്യ സായൂജ്യയെ രണ്ടാം പ്രതിയായ സതീഷിന്‍റെ കാമുകി സുജിത തന്‍റെ വീട്ടില്‍ വിളിച്ചുവരുത്തി ഇരുവരും ചേർന്ന് മർദിക്കുകയും കത്തി ഉപയോഗിച്ച്‌ വെട്ടിക്കൊലപ്പെടുത്താൻ ശ്രമിക്കുകയും ചെയ്തതായി പരാതിയില്‍ പറയുന്നു. തുടർന്ന് മെഡിക്കല്‍ കോളജില്‍ ചികിത്സ തേടിയ ഇവർ കടയ്ക്കല്‍ പൊലീസില്‍ പരാതി നല്‍കുകയായിരുന്നു.
തുടർന്ന് പ്രതികള്‍ ഒളിവില്‍ പോകുകയും 2024 ജനുവരിയില്‍ രണ്ടാം പ്രതി അറസ്റ്റിലാവുകയായിരുന്നു. റിമാൻഡിലായ ഇവർ ഇപ്പോള്‍ ജ്യാമ്യത്തിലാണ്. ഒളിവിലായിരുന്ന സതീഷ് ജാമ്യം തേടി ഹൈകോടതിയെ സമീപിച്ചെങ്കിലും കോടതി ജാമ്യാപേക്ഷ തള്ളുകയായിരുന്നു.
തുടർന്ന് കടയ്ക്കല്‍ പൊലീസ് ചൊവ്വാഴ്ച പ്രതിയെ അറസ്റ്റ് ചെയ്യുകയായിരുന്നു. നിരവധി കേസിലെ പ്രതിയാണ് അറസ്റ്റിലായ സതീഷ്. കടയ്ക്കല്‍ സ്റ്റേഷനില്‍ നാല് കേസും ചിതറ സ്റ്റേഷനില്‍ രണ്ട് കേസും, പാങ്ങോട്, വലിയമല പോലീസ് സ്റ്റേഷനുകളില്‍ ഓരോ കേസും നിലവിലുണ്ട്. പോക്സോ കേസ് ഉള്‍പ്പെടെ സ്ത്രീപീഡന കേസുകളാണ് കൂടുതലും.
2018 ല്‍ സ്കൂള്‍ വിദ്യാർഥിയായിരുന്ന പരാതിക്കാരിയെ വിവാഹ വാഗ്ദാനം നല്‍കി പീഡിപ്പിച്ച പ്രതി പോക്സോ കേസില്‍ ജയിലിലാകുകയും പുറത്തിറങ്ങിയ ഇയാള്‍ മൂന്ന് വർഷത്തിന് ശേഷം കുട്ടിയെ വിവാഹം കഴിച്ച്‌ കേസില്‍നിന്ന് രക്ഷപ്പെടുകയായിരുന്നു.