പെരുമ്പാവൂർ: മാമോദീസ നടന്ന വീട്ടിൽ നിന്നും ലക്ഷങ്ങൾ വിലമതിക്കുന്ന ആഭരണങ്ങൾ കവർച്ച ചെയ്ത യുവതിയെ പോലീസ് പിടികൂടി. ഇടുക്കി കൊന്നത്തടി വെള്ളത്തൂവൽ എരുപ്പേക്കാട്ടിൽ വീട്ടിൽ റംസിയയെയാണ് കോടനാട് പോലീസ് അറസ്റ്റ് ചെയ്തത്.
കഴിഞ്ഞ മെയ് ആറിന് റംസിയ സുഹൃത്തിന്റെ കുട്ടിയുടെ മാമോദീസയിൽ പങ്കെടുക്കാൻ കോടനാട് എത്തിയതായിരുന്നു. ചടങ്ങുകൾക്കിടയിൽ ഡയമണ്ട് നെക്ലെസ് ഉൾപ്പെടെയുള്ള സ്വർണ്ണാഭരണങ്ങൾ പ്രതി ആരുമറിയാതെ കൈക്കലാക്കുകയായിരുന്നു. ചടങ്ങിൽ ധരിച്ചിരുന്നതും, ഗിഫ്റ്റ് കിട്ടിയതുമായ ആഭരണങ്ങൾ മുറിയിൽ അലമാരിയിൽ സൂക്ഷിച്ചിരുന്നു, ഇതാണ് റംസിയ മോഷ്ടിച്ചത്.
മോഷ്ടിയ്ക്കപ്പെട്ട ആഭരണങ്ങൾ നേര്യമംഗലം, പെരുമ്പാവൂർ ഭാഗത്തെ ജ്വല്ലറികൾ, ഫൈനാൻസ് സ്ഥാപനങ്ങൾ എന്നിവിടങ്ങളിൽ നിന്നും കണ്ടെടുത്തു. നാല് ലക്ഷത്തിലേറെ രൂപയുടെ ആഭരണങ്ങളാണ് മോഷ്ടിച്ചത്.