കൊച്ചി : കൊച്ചിയില്‍ യുവതിയെ കഴുത്തില്‍ കത്തി കയറ്റി കൊലപ്പെടുത്തി.ചങ്ങനാശേരി സ്വദേശി രേഷ്മ എന്ന 22കാരിയാണ് കൊല്ലപ്പെട്ടത്. കലൂര്‍ കൈപ്പിള്ളി റെസിഡൻസി ഓയോ ഹോട്ടലിലാണ് കൊലപാതകം നടന്നത്. സംഭവത്തില്‍ ഓയോ റൂം കെയര്‍ടേക്കറായ കോഴിക്കോട് സ്വദേശി നൗഷാദ് (30) പിടിയിലായി.
കലൂര്‍ പൊറ്റക്കുഴി മസ്ജിദ് ലെയ്‌നില്‍ കൈപ്പിള്ളി റെസിഡൻസി ഓയോ ഹോട്ടലിലാണ് നൗഷാദ് ജോലി ചെയ്യുന്നത്. ഇവിടെ വച്ചായിരുന്നു കൊലപാതകം. നൗഷാദും രേഷ്മയും സമൂഹമാദ്ധ്യമം വഴിയാണ് പരിചയപ്പെട്ടത്. അടുപ്പത്തിലായിരുന്നുവെന്നാണ് സൂചന.ബുധനാഴ്ച നൗഷാദിനെ കാണാൻ രേഷ്മ വീട്ടില്‍ നിന്ന് കലൂരിലെത്തുകയായിരുന്നു. ഹോട്ടലില്‍ വച്ച്‌ തര്‍ക്കത്തിനിടെ നൗഷാദ് കത്തിയെടുത്ത് കഴുത്തിലും ദേഹമാസകലവും കുത്തി. വലതുകഴുത്തിനേറ്റ ആഴത്തിലുള്ള മുറിവാണ് രേഷ്മയുടെ ജീവനടുത്തത്. ചോര വാര്‍ന്നായിരുന്നു മരണം.
ഓയോ ഹോട്ടലിലെ മറ്റൊരു ജീവനക്കാരൻ പൊലീസില്‍ വിവരമറിയിച്ചു. പൊലീസ് എത്തി ഇയാളെ കസറ്റഡിയിലെടുത്തു. നൗഷാദ് ഏതാനും വര്‍ഷങ്ങളായി ഇവിടെ ജോലിയിലുണ്ട്. കൊലപാതക കാരണം വ്യക്തമല്ല. മൃതദേഹം ആശുപത്രിയിലേക്ക് മാറ്റി. ഇന്ന് പോസ്റ്റ്‌മോര്‍ട്ടം നടത്തും. നൗഷാദിനെ ഇന്ന് രാവിലെ കോടതിയില്‍ ഹാജരാക്കും