കൊച്ചി: എറണാകുളം റൂറൽ ജില്ലയുടെ പുതിയ മേധാവിയായി ഡോക്ടർ വൈഭവ് സക്സേന ചുമതലയേറ്റു. എസ്.പി.യുടെ ചേംബറിൽ നടന്ന ചടങ്ങിലാണ് സ്ഥാനമൊഴിയുന്ന എസ്പി വിവേക് കുമാർ, ഡോ.വൈഭവ് സക്സേനയെ സ്വീകരിച്ച് ചുമതല കൈമാറിയത്. സ്ഥാനമൊഴിയുന്ന എസ്പി വിവേക് കുമാർ കൊല്ലം സിറ്റി പോലീസ് കമ്മീഷണർ ആയി ചുമതല ഏറ്റെടുത്തു.
2016 ബാച്ച് കേരള കേഡർ ഐപിഎസ് ഓഫീസർ ആയ ഡോ.വൈഭവ് സക്സേന റൂറൽ ജില്ലയുടെ ചുമതല ഏൽക്കുന്ന അമ്പത്തിയൊമ്പതാമത്തെ എസ്.പിയാണ്. കാസർഗോഡ് ജില്ലാ പോലീസ് മേധാവിയിൽ നിന്നുമാണ് അദ്ദേഹം എറണാകുളം റൂറൽ ജില്ല ചുമതലയിലേക്ക് വന്നത്. ലക്നൗ സ്വദേശിയായ വൈഭവ് സക്സേന മാനന്തവാടി എഎസ്പി, കെഎപി ഒന്നാം ബറ്റാലിയൻ കമാണ്ടന്റ്, പോലീസ് ഹെഡ്ക്വാർട്ടേഴ്സിൽ എഎഐജി, തിരുവനന്തപുരം സിറ്റി ഡി.സി.പി എന്നിങ്ങനെയും സേവനം അനുഷ്ഠിച്ചിട്ടുണ്ട്. അദ്ദേഹത്തിന് കുറ്റാന്വേഷണമികവിന് കേന്ദ്ര ആഭ്യന്തരമന്ത്രിയുടെ അവാർഡും ലഭിച്ചിട്ടുണ്ട്.