ബിഹാറില്‍ ബക്സര്‍ ജില്ലയില്‍ ട്രെയിൻ പാളംതെറ്റി. അപകടത്തില്‍ 4 യാത്രക്കാര്‍ മരിച്ചു. 100 ല്‍ ഏറെപ്പേര്‍ക്കു പരുക്കേറ്റു. സംഭവം ബക്സര്‍ ജില്ലയിലെ രഘുനാഥ്പൂര്‍ റെയില്‍വേ സ്റ്റേഷന് സമീപം ആയിരുന്നു. ഡല്‍ഹിയില്‍നിന്ന് അസമിലെ ഗുവാഹത്തിയിലേക്കു പോകുകയായിരുന്ന 12506 നോര്‍ത്ത് ഈസ്റ്റ് എക്സ്പ്രസിന്റെ 6 കോച്ചുകള്‍ രഘുനാഥ്പുര്‍ സ്റ്റേഷനിലാണ് പാളം തെറ്റിയത്.
രാത്രി 9.50 ന് ട്രെയിൻ ബക്സര്‍ സ്റ്റേഷൻ വിട്ട് രഘുനാഥ്പുര്‍ സ്റ്റേഷനു സമീപമെത്തിയപ്പോഴാണ് അപകടം. നാട്ടുകാരാണ് ആദ്യം രക്ഷാപ്രവര്‍ത്തനത്തിന് എത്തിയത്. 3 എസി കോച്ചുകള്‍ അടക്കം 6 കംപാര്‍ട്മെന്റുകളാണു പാളം തെറ്റിയത്. ദുരന്തനിവാരണ സേന സ്ഥലത്തെത്തി. പട്നയിലേത് അടക്കം ആശുപത്രികളെല്ലാം സജ്ജമാക്കി. അപകടം മൂലം ഈ പാതയില്‍ ഗതാഗതം സ്തംഭിച്ചു. അപകടത്തിന്റെ കാരണം ഇതുവരെ വ്യക്തമായിട്ടില്ല.