ചേര്‍ത്തല: ബാറില്‍ ഭീകരാന്തരീക്ഷം സൃഷ്ടിച്ച യുവാക്കളെ പോലീസ് അറസ്റ്റ് ചെയ്തു. കഴിഞ്ഞ ബുധനാഴ്ച ചേര്‍ത്തലയിലെ ബാറില്‍ ആക്രമണം നടത്തിയ കേസില്‍ ചേര്‍ത്തല തെക്കേ ചിറ്റേഴത്ത് സൂര്യ (31), തെക്കേ ചിറ്റേഴത്ത് ദീപേഷ് (21), നികര്‍ത്തില്‍ അഭിനവ് (19) എന്നിവരെയാണ് പിടികൂടിയത്. ബാറില്‍ എത്തിയ യുവാക്കള്‍ കത്തികാട്ടി ജീവനക്കാരെ ഭീഷണിപ്പെടുത്തി മദ്യം വാങ്ങുകയും പണം ആവശ്യപ്പെട്ട സ്റ്റാഫിനെ അസഭ്യം പറയുകയുകയുമായിരുന്നു.
സോഡാ കുപ്പികളും മറ്റും പൊട്ടിച്ച്‌ ഭീകരാന്തരീക്ഷം സൃഷ്ടിച്ച സംഘം ബാറില്‍ ഉണ്ടായിരുന്ന ടെലിവിഷൻ അടിച്ചു തകര്‍ക്കുകയും ചെയ്തു. തുടര്‍ന്ന് ഇവിടെ നിന്ന് പോയ പ്രതികള്‍ ശാവേശേരി ഭാഗത്തുള്ള വീട്ടില്‍ കയറി ആക്രമണം നടത്തിയിരുന്നു. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു.