ബംഗ്ലാദേശിലെ അനിഷ്ട സംഭവങ്ങള്‍ തുടരുന്ന സാഹചര്യത്തില്‍ എയർ ഇന്ത്യ തിങ്കളാഴ്ച ധാക്കയിലേക്കും തിരിച്ചുമുള്ള വിമാനങ്ങള്‍ അടിയന്തര പ്രാബല്യത്തോടെ നിർത്തിവച്ചു. യാത്രക്കാർക്കുള്ള റീ ഷെഡ്യൂളിംഗ് അല്ലെങ്കില്‍ ക്യാൻസലേഷൻ ചാർജുകളില്‍ ഒറ്റത്തവണ ഇളവ് എയർലൈനുകള്‍ പ്രഖ്യാപിച്ചിട്ടുണ്ട്.
“ബംഗ്ലാദേശിലെ ഉയർന്നുവരുന്ന സാഹചര്യം കണക്കിലെടുത്ത് ധാക്കയിലേക്കും തിരിച്ചുമുള്ള ഞങ്ങളുടെ വിമാനങ്ങളുടെ ഷെഡ്യൂള്‍ ചെയ്ത ഓപ്പറേഷനുകള്‍ ഉടനടി റദ്ദാക്കിയിരിക്കുകയാണ്. ഞങ്ങള്‍ തുടർച്ചയായി സാഹചര്യം നിരീക്ഷിച്ചുവരികയാണ്. അതിഥികളുടെയും ജോലിക്കാരുടെയും സുരക്ഷയാണ് പ്രധാനം. കൂടുതല്‍ വിവരങ്ങള്‍ക്ക്, ഡാക്കയിലേക്കും തിരിച്ചുമുള്ള യാത്രയ്‌ക്കായി സ്ഥിരീകരിക്കപ്പെട്ട ബുക്കിംഗുള്ള യാത്രക്കാർക്ക് പിന്തുണ നല്‍കുന്നതിനായി 24 മണിക്കൂറും പ്രവർത്തിക്കുന്ന ഈ നമ്ബറുകളില്‍ ബന്ധപ്പെടാവുന്നതാണ്. 011-69329333 / 011-69329999.” യാത്രക്കാരുടെയും ക്രൂ അംഗങ്ങളുടെയും സുരക്ഷയാണ് തങ്ങളുടെ മുൻഗണനയെന്ന് എയർ ഇന്ത്യ അറിയിച്ചു.
കഴിഞ്ഞ കുറച്ച്‌ ദിവസങ്ങളായി ബംഗ്ലാദേശില്‍ 300-ലധികം ആളുകളുടെ ജീവൻ അപഹരിച്ച പുതിയ അക്രമങ്ങള്‍ പ്രധാനമന്ത്രി ഷെയ്ഖ് ഹസീനയെ പദവിയില്‍ നിന്ന് രാജിവയ്ക്കാൻ നിർബന്ധിതയാക്കി. അക്രമാസക്തരായ പ്രതിഷേധക്കാർ ധാക്കയിലെ ഹസീനയുടെ വസതിയായ ‘ഗണഭബൻ’ അടിച്ചുതകർത്തതോടെ അവരും രാജ്യം വിട്ടു. ആയിരക്കണക്കിന് പ്രതിഷേധക്കാർ അവരുടെ വസതിയുടെ മുറികള്‍ കൊള്ളയടിക്കുകയും നശിപ്പിക്കുകയും റെയ്ഡ് ചെയ്യുകയും ചെയ്തു