ആലപ്പുഴ: ലിഫ്റ്റ് ചോദിച്ച്‌ ബൈക്കില്‍ കയറിയ ശേഷം കവര്‍ച്ച നടത്തിയ കേസില്‍ രണ്ട് പേര്‍ അറസ്റ്റില്‍. കലവൂര്‍ എഎൻ കോളനിയില്‍ അരുണ്‍ (മൊട്ട-28), മണ്ണഞ്ചേരി മണിമല വീട്ടില്‍ നിജാസ് (തട്ട്-27) എന്നിവരെയാണ് ആലപ്പുഴ സൗത്ത് പോലീസ് അറസ്റ്റ് ചെയ്തത്.
സ്വകാര്യസ്ഥാപനത്തിലെ ജീവനക്കാരനായ കൈനകരി സ്വദേശിയാണ് കവര്‍ച്ചയ്ക്ക് ഇരയായത്. ഇയാള്‍ ജോലികഴിഞ്ഞ് രാത്രി ബൈക്കില്‍ വീട്ടിലേക്ക് പോകവേ ആലപ്പുഴ എസ്ഡി കോളജിനു മുൻവശത്തുവച്ച്‌ ബൈക്കില്‍ ലിഫ്റ്റ് ചോദിച്ച്‌ കയറിയ മോഷ്ടാക്കള്‍ ചങ്ങനാശേരി ജംഗ്ഷനു സമീപത്തുവച്ച്‌ ഇയാളുടെ കഴുത്തിന് ചുറ്റിപിടിച്ച്‌ മര്‍ദിക്കുകയായിരുന്നു. ബൈക്കിന്‍റെ താക്കോല്‍ ഊരി കുത്തി പരിക്കേല്‍പ്പിക്കുകയും ചെയ്തു. പിന്നീട് കാറിലുണ്ടായിരുന്ന പേഴ്സ് ബലമായി പിടിച്ചുവാങ്ങുകയും 2400 രൂപ കവരുകയുമായിരുന്നു.
പരാതിയുടെ അടിസ്ഥാനത്തില്‍ പോലീസ് കേസെടുത്ത് നടത്തിയ അന്വേഷണത്തിലാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍റ് ചെയ്തു