ഹരിപ്പാട്: മീൻപിടിക്കാനായി പോയ യുവാവിനെ കായംകുളം കായലില്‍ കാണാതായി. ആറാട്ടുപുഴ കിഴക്കേക്കര പട്ടോളിമാര്‍ക്കറ്റ് കന്നേല്‍ പുതുവല്‍ വീട്ടില്‍ എസ്. സുജിത്തി(35)നെയാണ് കാണാതായത്. ഇന്നലെ പുലര്‍ച്ചെ അഞ്ചോടെയാണ് സുജിത്ത് വീട്ടില്‍ നിന്ന് പോയത്. തിരികെ എത്താൻ വൈകിയതിനെ തുടര്‍ന്ന് തിരക്കി ചെന്നപ്പോള്‍ പട്ടോളിമാര്‍ക്കറ്റ് കടവിനു സമീപം ഇദ്ദേഹം പോയ വള്ളം കമിഴ്ന്നു കിടക്കുന്നതായി കണ്ടെത്തുകയായിരുന്നു. വല പകുതി നീട്ടിയ നിലയിലുമായിരുന്നു.
തുടര്‍ന്ന് നാട്ടുകാരും കായംകുളത്തു നിന്നും ഹരിപ്പാട് നിന്നുമെത്തിയ അഗ്നിരക്ഷാസേനയും ചേര്‍ന്ന് മണിക്കൂറുകളോളം കായലില്‍ തെരച്ചില്‍ നടത്തിയെങ്കിലും കണ്ടെത്താൻ സാധിച്ചില്ല. പിന്നീട് സ്‌കൂബാ ടീമും എത്തി തിരച്ചില്‍ നടത്തിയെങ്കിലും കണ്ടെത്താൻസാധിക്കാതെ വന്നതോടെ വൈകുന്നേരത്തോടെ നിര്‍ത്തി. ഇന്ന് തെരച്ചില്‍ തുടരും. വിദേശത്തു ജോലിയുണ്ടായിരുന്ന സുജിത്ത് മൂന്നു മാസം മുൻപാണ് നാട്ടിലെത്തിയത്.