നേമം: ഓട്ടോ ഡ്രൈവറുടെ കൈയില്‍ നിന്നും പണം പിടിച്ചുപറിച്ച സംഭവത്തിലെ രണ്ട് പ്രതികളെക്കൂടി നേമം പോലീസിന്റെ പിടിയില്‍. ഒന്നും മൂന്നും പ്രതികളായ നേമം ചാനല്‍ സ്വദേശി ആലിഫ്ഖാൻ (36), നേമം സ്വദേശി അജി എന്ന അജി (36) തുടങ്ങിയവരെയാണ് നേമം പോലീസ് അറസ്റ്റ് ചെയതത്. മൂന്നാം പ്രതി പാപ്പനംകോട് എസ്റ്റേറ്റ് അച്ചു നിവാസില്‍ സുഭാഷ് (35) നേരത്തേ അറസ്റ്റിലായിരുന്നു.
ആഗസ്റ്റ് 30ന് ഉച്ചക്ക് മൂന്നോടെയാണ് സംഭവം. കോഴി വേസ്റ്റ് ഓട്ടോയില്‍ കയറ്റിക്കൊണ്ടു നില്‍ക്കുകയായിരുന്ന മണക്കാട് സ്വദേശിയായ റിയാസിനോടാണ് മൂന്നാം പ്രതി പണം ആവശ്യപ്പെട്ടത്. ഇത് നല്‍കാത്തതിനുള്ള വിരോധം കാരണം സുഭാഷ് പിന്നീട് മറ്റ് രണ്ട് പ്രതികളുമയി ചേര്‍ന്ന് സ്ഥലത്തെത്തുകയും റിയാസില്‍നിന്ന് ബലപ്രയോഗത്തിലൂടെ 5,000 രൂപ കവര്‍ന്ന് രക്ഷപ്പെടുകയുമായിരുന്നു.
പരാതി നല്കിയതെ തുടര്‍ന്ന് നടത്തിയ അന്വേഷണത്തില്‍ നേമം എസ്.ഐമാരായ എം. മധുമോഹൻ, ഷിജു, രജീഷ് തുടങ്ങിയവരുടെ നേതൃത്വത്തിലുള്ള സംഘമാണ് പ്രതികളെ കസ്റ്റഡിയിലെടുത്തത്. പിടിയിലായവര്‍ നിരവധി ക്രിമിനല്‍ കേസുകളില്‍ പ്രതികളാണ്. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു