കൊല്ലം: ചിതറയില്‍ പെട്രോള്‍ പമ്ബിലുണ്ടായ തര്‍ക്കത്തിനിടെ യുവാവിനെ തറയോട് കൊണ്ട് തലയ്ക്കടിച്ച്‌ കൊലപ്പെടുത്തി. ദര്‍പ്പക്കാട് സ്വദേശി സെയ്ദലി(ബൈജു – 34) ആണ് മരിച്ചത്. സംഭവത്തില്‍ നാല് പേരെ പോലീസ് അറസ്റ്റ് ചെയ്തിട്ടുണ്ട്. ഇന്നലെ വൈകിട്ട് ആറിനാണ് സംഭവം നടന്നത്. നാല് സുഹൃത്തുക്കള്‍ക്കൊപ്പം കാറില്‍ പമ്ബിലെത്തിയ ബൈജു, മദ്യലഹരിയിലായിരുന്ന ഇവരുമായി തര്‍ക്കമുണ്ടാവുകയും പെട്രോള്‍ നിറച്ച ശേഷം വാഹനം മാറ്റി നിര്‍ത്തിയശേഷം സംഘര്‍ഷത്തിലേക്ക് വഴിവെയ്ക്കുകയുമായിരുന്നു.
തര്‍ക്കത്തിനിടെ കാറില്‍ നിന്നിറങ്ങിയ ഷാജഹാൻ, നിഹാസ് എന്നിവര്‍ ബൈജുവിന്‍റെ തലയില്‍ തറയോട് കൊണ്ട് ശക്തിയായി അടിക്കുകയായിരുന്നു. സംഭവം കണ്ടുനിന്ന നാട്ടുകാര്‍ ചേര്‍ന്ന് ബൈജുവിനെ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. ബൈജുവിനെ ആക്രമിച്ചവരെ നാട്ടുകാര്‍ തടഞ്ഞുവച്ച്‌ പോലീസില്‍ ഏല്‍പ്പിക്കുകയായിരുന്നു. ആക്രമണത്തിന് ശേഷം കാറുമായി രക്ഷപ്പെട്ട ഷാൻ, ഷഹീൻ എന്നിവരെ ഏനാത്ത് മേഖലയില്‍ വച്ച്‌ പോലീസ് പിടികൂടുകയും ചെയ്തു.