ഹരിപ്പാട്: അയല്‍വാസിയുടെ വെടിയേറ്റ് ഗൃഹനാഥൻ മരിച്ചു. ഹരിപ്പാട് പള്ളിപ്പാട് വഴുതാനത്ത് ശ്രീഹരിയില്‍ സോമനാണ് (55) എയര്‍ഗണ്ണില്‍നിന്നുള്ള വെടിയേറ്റ് മരിച്ചത്. തിങ്കളാഴ്ച വൈകീട്ട് ആറോടെ ഇവര്‍ തമ്മിലുണ്ടായ വാക്കേറ്റം വെടിവെപ്പില്‍ കലാശിക്കുകയായിരുന്നു.
വാക്കേറ്റത്തിനിടെ അയല്‍വാസിയും വിമുക്തഭടനുമായ കുറവന്തറയില്‍ പ്രസാദാണ് വെടിയുതിര്‍ത്തതെന്ന് ഹരിപ്പാട് പൊലീസ് പറഞ്ഞു. പ്രസാദ് ഒളിവിലാണ്. വയറ്റിലും മുതുകിലുമാണ് വെടിയേറ്റത്. ഗുരുതര പരിക്കേറ്റ സോമനെ ഹരിപ്പാട് താലൂക്ക് ആശുപത്രിയിലും തുടര്‍ന്ന് ആലപ്പുഴ മെഡിക്കല്‍ കോളജ് ആശുപത്രിയിലും പ്രവേശിപ്പിച്ചെങ്കിലും എട്ടരയോടെ മരിച്ചു. സോമനുമായി പ്രസാദും സഹോദരനും കഴിഞ്ഞ ദിവസങ്ങളിലും വാക്തര്‍ക്കവും സംഘര്‍ഷവും ഉണ്ടായിരുന്നതായി പറയുന്നു.