മുവാറ്റുപുഴ: ലോട്ടറി വിൽപനക്കാരനായ അച്ഛന്റെ കയ്യിൽ നിന്നും മകൻ വാങ്ങിയ ടിക്കറ്റിന് ഒന്നാം സമ്മാനം ലഭിച്ചു. മൂവാറ്റുപുഴ കടാതി കൃഷ്ണവിലാസത്തിൽ രവീന്ദ്രനും, മകൻ രാജേഷുമാണ് ഭാഗ്യവാന്മാരായ അച്ഛനും, മകനും. നറുക്കെടുത്ത കാരുണ്യ പ്ലസ് ലോട്ടറിയുടെ ഒന്നാം സമ്മാനം 80ലക്ഷം ലഭിച്ച സന്തോഷത്തിലാണ് ഈ കുടുംബവും.
ഫ്ലോറിങ് ജോലി ചെയ്യുന്ന താൻ അച്ഛന്റെ കയ്യിൽ നിന്നും ദിവസവും ലോട്ടറി ടിക്കറ്റ് വാങ്ങാറുണ്ടെന്നും, മിക്കവാറും 5,000 രൂപയുടെയും 500 രൂപയുടെയും സമ്മാനം ലഭിക്കാറുണ്ടെന്നും രാജേഷ് പറഞ്ഞു. സമ്മാനത്തുക കൊണ്ട് കടങ്ങൾ വീട്ടണമെന്നും, ഭാവി ജീവിതം സുരക്ഷിതമാക്കാനുള്ള എന്തെങ്കിലും ചെയ്യണമെന്നുമാണ് രാജേഷിന്റെ ആഗ്രഹം.