മുവാറ്റുപുഴ: കോളേജ് വിട്ടശേഷം വീട്ടിലേക്ക് പോകാൻ തുടങ്ങിയ വിദ്യാർത്ഥിനി അമിതവേഗത്തിൽ എത്തിയ ബൈക്കിടിച്ച് മരിച്ചു. മൂവാറ്റുപുഴ നിർമ്മല കോളേജിലെ അവസാന വർഷ ബികോം വിദ്യാർത്ഥിനിയായ വാളകം കുന്നയ്ക്കാൽ വടക്കേ പുഷ്പകം രഘുവിന്റെ മകൾ നമിതയാണ് (20) അപകടത്തിൽ മരിച്ചത്.
ബുധനാഴ്ച വൈകിട്ട് അഞ്ചു മണിക്ക് കോളേജിൽ നിന്നും പുറത്തിറങ്ങിയ നമിതയും, കൂട്ടുകാരിയും കോളേജിനു മുന്നിലെ റോഡ് വളരെ ശ്രദ്ധയോടെ മുറിച്ചുകടക്കാൻ തുടങ്ങുമ്പോഴാണ് അശ്രദ്ധമായും, അമിതവേഗത്തിലും എത്തിയ ബൈക്കുകാരൻ ഇരുവരെയും ഇടിച്ചു വീഴ്ത്തിയത്. ബസ്റ്റോപ്പിൽ ഉണ്ടായിരുന്ന കോളേജ് വിദ്യാർത്ഥികൾ ഉൾപ്പെടെയുള്ളവർ ഇരുവരേയും ആശുപത്രിയിൽ എത്തിച്ചെങ്കിലും നമിതയുടെ ജീവൻ രക്ഷിക്കാനായില്ല.
അപകടത്തിൽ നമിതയുടെ സുഹൃത്തായ അനുശ്രീ രാജിനും, ബൈക്ക് ഓടിച്ചിരുന്ന ഏനാനല്ലൂർ സ്വദേശി അൻസണിനും ഗുരുതരമായ പരിക്കേറ്റിട്ടുണ്ട്.