ചങ്ങനാശ്ശേരി: ചങ്ങനാശ്ശേരിയില്‍ വൻ കഞ്ചാവുവേട്ട. വിദ്യാർഥികള്‍ക്കും യുവാക്കള്‍ക്കും വിതരണം ചെയ്യാൻ എത്തിച്ച 12.5 കിലോ കഞ്ചാവ് എക്സൈസ് പിടികൂടി.ശനിയാഴ്ച രാത്രി എട്ടോടെ കോട്ടയം റെയില്‍വേ സ്റ്റേഷന് സമീപത്തുനിന്ന് ട്രാവല്‍ ബാഗില്‍ കഞ്ചാവുമായെത്തിയ ചങ്ങനാശ്ശേരി മംഗലാവ്പറമ്ബില്‍ ഷെറോണ്‍ നജീബിനെയാണ് എക്സൈസ് സംഘം പിടികൂടിയത്.
വാറന്‍റ് കേസില്‍ പ്രതിയായ ഷാരോണിനെ തിരിച്ചറിഞ്ഞ ചങ്ങനാശ്ശേരി എക്സൈസ് ഇൻസ്‌പെക്ടർ ടി.എസ്. പ്രമോദിന്റെ നേതൃത്വത്തിലുള്ള സംഘം ഇയാളെ ചോദ്യം ചെയ്യുകയും പരിശോധന നടത്തുകയും ചെയ്യുകയുമായിരുന്നു. ആന്ധ്രപ്രദേശില്‍നിന്ന് കോട്ടയം റെയില്‍വേ സ്റ്റേഷനില്‍ ആന്ധ്ര സ്വദേശികളാണ് ഇയാള്‍ക്ക് കഞ്ചാവ് എത്തിച്ചു കൊടുത്തതെന്നും ഇവിടെനിന്ന് ചങ്ങനാശ്ശേരി റെയില്‍വേ സ്റ്റേഷൻ എത്തിച്ച്‌ വീട്ടിലേക്ക് കൊണ്ടുപോകാൻ ശ്രമിക്കുന്നതിനിടയിലാണ് ഇയാള്‍ പിടിയിലായതെന്നും എക്സൈസ് സംഘം പറഞ്ഞു
പരിശോധനക്ക് അസി. എക്സൈസ് ഇൻസ്‌പെക്ടർ ടി.എസ്. സുരേഷ്, ഗ്രേഡ് പ്രിവന്റിവ് ഓഫിസർ സന്തോഷ്, പ്രിവന്റിവ് ഓഫിസർ ആന്റണി മാത്യു സിവില്‍ എക്സൈസ് ഓഫിസർമാരായ രതീഷ് കെ. നാണു, എ.ജി. പ്രവീണ്‍ കുമാർ, ഷഫീഖ് വനിത സിവില്‍ എക്സൈസ് ഓഫിസർ നിത്യ മുരളി, പ്രിയ, ഡ്രൈവർ മനീഷ് എന്നിവർ നേതൃത്വം നല്‍കി. ഷെറോണ്‍ നജീബ് നിരവധി ക്രിമിനല്‍ക്കേസില്‍ പ്രതിയാണെന്നും എക്സൈസ് അറിയിച്ചു.