പാലക്കാട്: നാളികേരം പെറുക്കാൻ പുഴയില്‍ ഇറങ്ങിയയാളെ ഒഴുക്കില്‍ പെട്ട് കാണാതായി. പാലക്കാട് അയിലൂർ മുതുകുന്നി പുഴയിലാണ് അപകടം. ആണ്ടിത്തറ പുത്തൻ വീട്ടില്‍ രാജേഷാണ് (42) ഒഴുക്കില്‍ പെട്ടത്. രാജേഷിനും വേണ്ടി അഗ്നിരക്ഷാസേനയും ആലത്തൂർ പൊലീസും തെരച്ചില്‍ തുടരുകയാണ്.
മുതുകുന്നി തടയണക്ക് സമീപം ഉച്ചക്ക് 2 മണിയോടെയാണ് സംഭവമുണ്ടായത്. വിദേശത്ത് നിന്ന് അവധിക്ക് നാട്ടിലെത്തിയതാണ് രാജേഷ്. നാളികേരം പെറുക്കാൻ സുഹൃത്തുക്കള്‍ക്കൊപ്പം പോയി വരുന്നതിനിടെയാണ് ഒഴുക്കില്‍ പെട്ടത്. ഒപ്പമുണ്ടായിരുന്നവർ ചേർന്ന് രാജേഷിനെ കരക്ക് കയറ്റാൻ ശ്രമം നടത്തിയെങ്കിലും രക്ഷപ്പെടുത്താൻ കഴിഞ്ഞില്ല.
പുഴയുടെ നല്ല ഒഴുക്കുള്ള ഭാഗത്തു വെച്ചാണ് രാജേഷിനെ കാണാതായിട്ടുള്ളതെന്ന് സുഹൃത്തുക്കള്‍ പറയുന്നു. അതേസമയം, രാജേഷിന് വേണ്ടിയുള്ള തെരച്ചില്‍ തുടരുകയാണ്.