കോതമംഗലം: നേര്യമംഗലം- അടിമാലി റൂട്ടിൽ ദേശീയപാതയിൽ വില്ലാഞ്ചിറ ഭാഗത്ത് ശക്തമായ കാറ്റിലും മഴയിലും മരം കടപുഴകി വാഹനങ്ങൾക്ക് മുകളിലേക്ക് വീണു. ഓടിക്കൊണ്ടിരുന്ന കെഎസ്ആർടിസി ബസ്സിനും, കാറിനു മുകളിലേക്ക് മരം കടപുഴകി വീണതിനെ തുടർന്ന് കാർ യാത്രക്കാരനായ രാജകുമാരി മുരിക്കുംതൊട്ടി സ്വദേശി ജോസഫ് മരിച്ചു. കാറിൽ യാത്ര ചെയ്തിരുന്ന മറ്റ് യാത്രക്കാർ പരിക്കുകളോടെ ആശുപത്രിയിൽ ചികിത്സയിലാണ്. രാജകുമാരി മുരിക്കുംതൊട്ടി സ്വദേശി ജോബിയും കുടുംബവുമാണ് കാറിലുണ്ടായിരുന്നത്. അപകടത്തെ തുടർന്ന് കാർ പൂർണമായി തകരുകയും, സ്ഥലത്തെ ഗതാഗതം തടസപ്പെടുകയും ചെയ്തു. കോതമംഗലത്തു നിന്നുള്ള ഫയർഫോഴ്സ് സംഘവും, പോലീസും, നാട്ടുകാരും ചേർന്ന് മരം വെട്ടിമാറ്റി ഗതാഗതം പുനസ്ഥാപിക്കാനുള്ള ശ്രമത്തിലാണ്.