മുന്‍ ഡിജിപി ഡോ. സിബി മാത്യൂസിനെതിരെ അന്വേഷണത്തിന് ഉത്തരവിട്ട് ഹൈക്കോടതി. 2017ല്‍ പുറത്തിറങ്ങിയ ‘നിര്‍ഭയം’ എന്ന അദ്ദേഹത്തിന്റെ പുസ്തകത്തില്‍ സൂര്യനെല്ലി ബലാത്സംഗ കേസിലെ അതിജീവിതയുടെ വിവരങ്ങള്‍ പങ്കുവെച്ചെന്ന പരാതിയിലാണ് നടപടി. പരാതിയില്‍ ഇന്ത്യന്‍ ശിക്ഷാനിയമത്തിലെ 228 എ വകുപ്പ് പ്രകാരം കേസെടുക്കണമെന്ന് മണ്ണന്തല പോലീസ് സ്‌റ്റേഷന്‍ ഹൗസ് ഓഫീസര്‍ക്ക് ഹൈക്കോടതി നിര്‍ദേശം നല്‍കി.
‘ഒരു ഐപിഎസ് ഓഫിസറുടെ അനുഭവക്കുറിപ്പുകള്‍’ എന്ന വിശേഷണത്തോടെ പോലീസ് ഉദ്യോഗസ്ഥനായി സേവനമനുഷ്ഠിച്ചപ്പോഴുള്ള അനുഭവങ്ങളാണ് സിബി മാത്യൂസ് നിര്‍ഭയമെന്ന പുസ്തകത്തിലൂടെ പങ്കുവെക്കുന്നത്. 1996ല്‍ പ്രായപൂര്‍ത്തിയാകുന്നതിന് മുമ്ബ് നിരവധി പേര് ചേര്‍ന്ന് ബലാത്സംഗത്തിന് ഇരയാക്കിയ സൂര്യനെല്ലിക്കേസിലെ അതിജീവിതയെ തിരിച്ചറിയാൻ കഴിയുന്ന പേരൊഴികെയുള്ള വിവരങ്ങളാണ് പുസ്തകത്തില്‍ പങ്കുവെച്ചത്.
അതിജീവിതയുടെ പേര് പ്രത്യക്ഷത്തില്‍ വെളിപ്പെടുത്തിയില്ലെങ്കിലും അവരുടെ മാതാപിതാക്കളുടെ പേര്, തൊഴില്‍, മേല്‍വിലാസം എന്നിവ പുസ്തകത്തില്‍ വെളിപ്പെടുത്തിയിട്ടുണ്ടെന്ന് പരാതിക്കാരന്‍ കെ കെ ജോഷ്വ പറയുന്നു. സിബി മാത്യൂസിനെതിരെ 228 എ പ്രകാരം കേസെടുക്കാനുള്ള കുറ്റമില്ലെന്ന പോലീസ് കമ്മീഷണറുടെ ഉത്തരവിനെതിരെയാണ് പരാതിക്കാരന്‍ കോടതിയെ സമീപിച്ചത്. 2019ല്‍ ആദ്യം മണ്ണന്തല പോലീസിനും തിരുവനന്തപുരം ജില്ലാ പോലീസ് മേധാവിക്കും പരാതി നല്‍കിയെങ്കിലും നടപടിയൊന്നും ഉണ്ടായില്ല. തുടര്‍ന്നായിരുന്നു ഹൈക്കോടതിയെ സമീപിച്ചത്
സൂര്യനെല്ലിക്കേസ് എന്ന തലക്കെട്ടിലുള്ള ഭാഗത്താണ് സിബി മാത്യൂസ് അതിജീവിതയെക്കുറിച്ചുള്ള വിവരങ്ങള്‍ എഴുതിയിരിക്കുന്നത്. ഈ ഭാഗത്ത് പീഡിപ്പിക്കപ്പെട്ട പെണ്‍കുട്ടിയെന്നാണ് അതിജീവിതയെ വിശേഷിപ്പിച്ചിരിക്കുന്നത്. ഇന്ത്യന്‍ ശിക്ഷാനിയമത്തിലെ 376 വകുപ്പ് പ്രകാരം അതിജീവിതയെ പേരോ തിരിച്ചറിയാൻ സഹായകരമായ മറ്റു വിവരങ്ങളോ വെളിപ്പെടുത്താന്‍ പാടില്ല. ഇത് 228 എ വകുപ്പിന്റെ അടിസ്ഥാനത്തില്‍ രണ്ട് വർഷം വരെ തടവും പിഴയും ലഭിക്കാവുന്ന കുറ്റമാണ്. ഇതുപ്രകാരമാണ് സിബി മാത്യൂസിനെതിരെ കേസെടുക്കാന്‍ ഹൈക്കോടതി നിര്‍ദേശിച്ചിരിക്കുന്നത്.
പുസ്തകത്തില്‍ അതീജിവിതയുടെ പേര് വെളിപ്പെടുത്തിയിട്ടില്ലെങ്കിലും അതിജീവിതയുടെ സ്‌കൂള്‍ അടക്കമുള്ള വിവരങ്ങള്‍ പങ്കുവെക്കുന്നതിലൂടെ അവരുടെ വ്യക്തിത്വം തിരിച്ചറിയാന്‍ സാധിക്കുമെന്ന് കോടതി കണ്ടെത്തി. തുടര്‍ന്നാണ് കോടതി സിബിക്കെതിരെ കേസെടുക്കാന്‍ ഉത്തരവിട്ടത്. പുസ്തകം പുറത്തിറങ്ങി രണ്ടു വര്‍ഷം കഴിഞ്ഞ് മാത്രമാണ് പരാതിപ്പെട്ടതെന്നും എഫ് ഐആര്‍ രജിസ്റ്റര്‍ ചെയ്യുന്നതിനു പകരം പ്രാഥമികാന്വേഷണം മതിയെന്നും സിബി മാത്യൂസിന്റെ വാദം.