കൊച്ചി: കൊച്ചി വാട്ടർമെട്രോയുടെ ഫോർട്ട് കൊച്ചി സർവീസ് ഇന്ന് ആരംഭിക്കും. 40 രൂപയാണ് ടിക്കറ്റ് നിരക്ക്. 20 മുതല്‍ 30 മിനിറ്റ് ഇടവേളകളില്‍ ഹൈക്കോർട്ട് ജംഗ്ഷൻ – ഫോർട്ട് കൊച്ചി റൂട്ടില്‍ സർവീസ് നടത്തുവാനാണ് തീരുമാനം. കൊച്ചിൻ ഷിപ്പിയാർ‍ഡ് സര്‍വീസിനുള്ള 14-ാമത് ബോട്ട് കഴിഞ്ഞ ദിവസം കൈമാറിയിരുന്നു. ഈ ബോട്ടിന്‍റെയും ടിക്കറ്റിംഗ് ഉള്‍പ്പെടെയുള്ള സംവിധാനങ്ങളുടെയും ട്രയല്‍ റണ്‍ പൂർത്തിയായതോടെയാണ് ഫോർട്ട് കൊച്ചി ടെർമിനലില്‍ നിന്ന് ഇന്ന് സർവ്വീസ് ആരംഭിക്കുന്നതെന്ന് കെഎംആർഎല്‍ അറിയിച്ചു. ഇതോടെ ഗതാഗതക്കുരുക്കില്‍പ്പെടാതെ ഫോർട്ട്കൊച്ചിയില്‍ എത്തിച്ചേരാൻ വാട്ടർ മെട്രോ സർവീസ് സഹായകരമാകുമെന്നാണ് പ്രതീക്ഷ.