തിരുവനന്തപുരം: പുതുവര്‍ഷം ആഘോഷിക്കാനെത്തിയ യുവതികള്‍ക്കെതിരെ ലൈംഗിക അതിക്രമം നടത്തിയ കേസില്‍ യുവാവ് അറസ്റ്റില്‍. കൊല്ലം ഇരവിപുരം സ്വദേശി അഖിലിനെയാണ് വര്‍ക്കല പൊലീസ് അറസ്റ്റ് ചെയ്തത്. ബാംഗ്ലൂരില്‍ ഐ ടി മേഖലയില്‍ പ്രവര്‍ത്തിക്കുന്ന 3 യുവതികള്‍ ഇവരുടെ സുഹൃത്തുക്കളോടൊപ്പമാണ് ന്യൂ ഇയര്‍ ആഘോഷിക്കാൻ ഡിസംബര്‍ 31 ന് വര്‍ക്കലയില്‍ എത്തുന്നത്.
ഓണ്‍ലൈനായി ബുക്ക് ചെയ്ത ഡോര്‍മിറ്ററിയില്‍ എത്തിയ ശേഷം ആഘോഷങ്ങളുടെ ഭാഗമായി ഇവര്‍ 6 പേരും മദ്യപിച്ചു. തിരികെ ഡോര്‍മിറ്ററിയില്‍ എത്തിയ ഇവര്‍ മയങ്ങിയ സമയത്താണ് അതിക്രമം നടന്നത്. ഡോര്‍മിറ്ററിയുടെ വാതില്‍ സംഘം ലോക്ക് ചെയ്തിരുന്നില്ല.
ജനുവരി 1 ന് പുലര്‍ച്ചെ 5.30 ഓടെ മദ്യലഹരിയില്‍ ഡോര്‍മിറ്ററിയില്‍ അതിക്രമിച്ചു കയറിയ 26കാരനായ അഖില്‍ ഒരു യുവതിയ്ക്ക് നേരെ ലൈംഗിക അതിക്രമം നടത്തുകയായിരുന്നു. യുവതി ബഹളം വച്ചപ്പോള്‍ സുഹൃത്തുക്കള്‍ ഉണര്‍ന്നെങ്കിലും അതിക്രമം തടയാൻ ഇവര്‍ക്ക് കഴിഞ്ഞിരുന്നില്ല. ഡോര്‍മിറ്ററിയില്‍ നിന്ന് ബഹളം കേട്ടെത്തിയ ജീവനക്കാരും മാനേജരും എത്തി യുവാവിനെ പിടികൂടി വര്‍ക്കല പൊലീസില്‍ ഏല്‍പ്പിക്കുകയായിരുന്നു.
എന്നാല്‍ യുവതികള്‍ കേസുമായി മുന്നോട്ട് പോകാൻ തയ്യാറായിരുന്നില്ല. മൊഴി നല്‍കാനോ പൊലീസുമായി സഹകരിക്കാനോ യുവതികള്‍ തയ്യാറായില്ല. പരാതി ഇല്ലാത്തതിനാല്‍ പെറ്റി കേസെടുത്തു പ്രതിയെ വിട്ടയച്ചു.